【新店直擊】卡哇伊布丁狗入銅鑼灣開Cafe

今年卡通主題或者Crossover Cafe特別多，今次終於輪到布甸狗啦！之前喺日本嘅布甸狗Cafe大受歡迎，第一間海外分店就選址喺香港，見到布甸狗喺Cafe裡面化身多個香港經典造型，又扮李小龍又坐天星小輪，真係好似香港人嘅呢。

嚟得Cafe當然唔會剩係睇布甸狗咁簡單啦，坐低睇睇份餐牌，為咗精益求精，暫時餐牌會跟返日本Cafe，粉絲們期待嘅香港限定主菜就仲未有。不過亦唔洗失望，因為香港餐牌上面嘅主菜、甜品同特飲都跟足日本Cafe，而且都有布甸狗嘅卡哇伊圖案，非常有心思。

主菜方面總共有六款，三款飯兩款粉同一款有三文治同班尼迪蛋嘅拼盤。最吸睛嘅當然係以布甸狗大頭造型上碟嘅飯。椰汁雞肉咖哩飯上面嘅布甸狗其實係黃薑飯，而咖喱汁比起一般日式咖喱辣少少，不過就多咗一份椰汁嘅濃香。而且仲有切成唔同形狀嘅多款蔬菜，幫賣相加分之餘亦為健康加分。

女孩子當然仲要填埋個甜品胃，香港版Cafe有4款精選甜品，我是布甸♪布甸狗同布甸狗芒果芭菲兩款都用咗真·布甸嚟扮布甸狗，貼題得嚟亦非常可愛。布甸狗香蕉焦糖班戟就用Pancake同朱古力醬畫成布甸狗，加埋焦糖香蕉，甜品控大滿足。

人多嘅話就可以開心Share個班戟塔，鬆軟Pancake足足有五層高，第一層鋪滿朱古力粉嚟扮布甸狗頂帽，細心睇連帽頂都有㗎！第一層Pancake下面仲有一層吉士Cream，下面四層Pancake就加咗朱古力糖漿，布甸狗杯裡面仲有焦糖糖漿比你按自己口味增加，剩係呢份心機都夠Sweet？唔止！個布甸狗杯係贈送紀念品，可以攞走㗎。

有嘢食就當然要有嘢飲，除咗普通咖啡檸茶之外，四款冷熱特飲當然都有布甸狗。熱戀棉花糖牛奶咖啡就係熱Latte再加布甸狗圖案嘅棉花糖，棉花糖慢慢融化喺咖啡裡面。雪糕芒果梳打就用雪糕同朱古力曲奇扮布甸狗，相機先食嘅時候記得快手啲。梳打裡面加咗芒果肉，底部又有芒果啫喱，所以有啲偏甜，細食嘅女仔飲一杯都可以當半個甜品。

所有特飲都附送杯墊，如果帶小朋友嚟Cafe嘅話亦可以請佢地提供布甸狗碗仔同餐具，咁細心，粉絲們冧唔冧呢？

Pompompurin Cafe
地址：銅鑼灣軒尼詩道525號澳門逸園中心B1
營業時間：11:00am-10:00pm (首日開業時間：6pm-10:00pm)

隨時接收最新資訊
讚好OpenRice專頁！