旺角本身已經好多掃街嘅嘢食，最近又有間新開嘅小食店，好撚串（佢個名真係咁叫）。聽個名就已經夠霸氣，佢啲串燒仲霸氣，足足有成10吋長！





呢間串燒店有三大類串燒，分別係地上系、海洋系同田園系，說穿了即係肉類、海鮮類同蔬菜類囉，腸呀、肥牛呀、雞呀、丸呀、鰻魚呀、帶子呀、牛油粟米呀等等大家最鍾意食嘅串燒都有，夾夾埋埋有超過40款，選擇困難症嘅朋友仔望住個menu應該會天然呆咗。





串燒以外，仲有啲炸物同小食嘅，其中一款「一口芝士」，一客4粒，即叫即炸，好鬼脆口，雖然未至於會有好勁嘅拉芝，但入面熱溶咗嘅芝士都好香口。



但講到霸氣，一定係三款皇牌：皇牌好撚串、地上最撚串同宇宙最撚串（我重申，我跟餐牌打㗎咋），開飯仔即場拎把尺度過，堅係有成10吋長呀，好啱相機食先！以宇宙串為例，一串就可以有齊晒牛肉、大蝦、帶子、魷魚、青紅黃椒、青口、雞肉同五花腩，係幾爽皮嘅。每串大約等5-10分鐘，邊燒邊加孜然粉、蒜粉等等，想要辣嘅出聲就可以加埋黑椒同辣醬，夠晒香口。

店主仲同開飯仔講，遲下會出埋銀河系串添喎，唔知會唔會有廿吋長呢？

好撚串
地址：旺角廣華街1號仁安大廈地下G1D號舖

文：Kar
相：Cathy


其他新店介紹：
韓風吹到嚟 浮誇鮮果沙冰店下月登陸 生果成座山咁高
美國人氣芝士蛋糕 The Cheesecake Factory香港第一分店 將登陸海港城
旺角開菲律賓炸雞分店 新推酥脆雞柳餐（有片）

 

隨時接收最新資訊
讚好OpenRice專頁！