午餐時間，唔少人都怕出街食多人，轉買外賣，但對OL嚟講，有時一個飯盒又好大份食唔晒，而且又高卡路里，不過轉買魚蛋燒賣又唔夠飽，炮台山最近就有一個新選擇，就係日式飯團，一個有米氣啱啱好，而且都係廿零蚊個，相當經濟。

睇睇下個老闆咁熟面口嘅，原來就係電影《鴨王》男主角何浩文(Dominic)，佢話喺美國食過好好食嘅飯團，所以就誠邀日本大廚 Otsuka 師傅及其團隊來港親自主理。 師傅好有堅持，所有飯團都係即叫即整，而且選用咗北海道No.1嘅米同日本紫菜，確保要高品質。

日式炸蝦飯團


同超市事先整好嘅飯團唔同，呢度嘅飯團拎上手仲係暖暖，炸蝦幾大條，咬咬都有蝦肉，炸得脆口。驚喜位反而係啲飯，有黏性唔會散到周圍係，但又粒粒分明唔會漿埋一舊，食落有米香同咬口。　


明太子飯團


明太子唔會太鹹，本來係主角，反而係襯托出飯嘅香味，紫菜保持脆度，諗起帶去野餐就正喇。

章魚燒


章魚燒唔算好太粒，不過就一口食得晒，唔會成口粉，而且老闆話因為呢度嘅章魚丸燒完仲會炸一炸，所以外皮會特別脆同無咁腍。

夏威夷式三文魚飯



魚生先用自家調合秘制醬汁醃過，加入咗胡麻油，滲出陣陣麻香，三文魚砌成大粒同細粒，口感上多點層次，師傅會按季節選取最好嘅三文魚，好似最近就用挪威的。

隨時接收最新資訊
讚好OpenRice專頁！