香港有唔少甜品店，但專注做冬甩嘅少之又少......幸好預計呢個禮拜開始，去灣仔就買到抵食爆Cream冬甩啦！以印尼為基地，喺菲律賓，馬來西亞同新加坡都有分店嘅呢間連鎖冬甩咖啡店終於嚟到香港插旗，冬甩有22款唔同口味任揀，一日試一款都要試到出年呀。

J.CO Donuts & Coffee嘅冬甩主要可以分成個圓形有忌廉餡，同水泡形無忌廉餡兩款。例如Berry Spears就屬於前者，上面鋪滿酸甜士多啤梨醬同白朱古力碎，中間係Cream Cheese，最抵讃嘅係中間做到爆Cream效果之餘，食落味道平衡甜而不膩。要知道無咁Heavy嘅話，就算On Diet偷食罪疚感都少啲吖嘛。

喺印尼最受歡迎嘅Al Capone就係屬於第二種，實心冬甩炸得啱啱好，拎上手都唔太油膩，加上白朱古力同焗香咗嘅杏仁片非常夾。

Avocado DiCaprio顧名思義用咗最近大熱嘅Super Food牛油果，中間嘅忌廉餡食到淡淡牛油果味，輕盈清新。不過面頭嘅朱古力脆脆偏甜，夾埋一齊食有少少妹仔大過主人婆嘅感覺。而朱古力Fans必試成個都係朱古力嘅Coco Loco，同加埋果仁更香口嘅Jackie Chunk。

想將呢份甜蜜開心Share比朋友？一盒盒嘅J.PoPs就啱哂啦！裡面有12款經典口味，總共24個迷你冬甩，無論係開Party甚至當散水餅都諗得過。

呢度嘅冬甩以甜味為主，最啱配一杯咖啡。J.CO嘅咖啡特別選用阿拉比卡咖啡豆，入口香醇。想特別啲話仲有泰式奶茶，柔滑富茶香，不過就會比咖啡甜。如果你係甜魔嘅話，仲有White Chocolate Frappe等冰沙揀。

意猶未盡嘅話，不妨食多杯Froyo先走。最後開飯仔仲有兩個預告：一，佢地將會喺呢個星期六(17/12)下晝三點，免費派發100個冬甩；二，除咗原有嘅22款口味外，聖誕節仲會有白色聖誕限定口味！

J.CO Donuts & Coffee Hong Kong（@j.cohongkong）張貼的相片 於 2016 年 12月 月 18 5:13上午 PST 張貼

餐廳日前公佈，將會喺12月21號（星期三）正式開幕，各位Fans可以食住冬甩過一個甜蜜聖誕啦！

開飯編輯推介：

1. 【專訪】有故事的Man 手紋母親心電圖 以上門私房菜延續愛

2. 11月份好評餐廳十強

3. 2017年港澳版米芝蓮指南

熱門文章推介：

1. 行葵廣 食紫薯 6間小食店逐間試

2. 走入荔枝角工廈 發掘唔同地方好味道

3. 精選芋圓甜品舖PK戰

隨時接收最新資訊
讚好OpenRice專頁！