【月餅巡禮】中秋追月又追星邊個明星出月餅？（有片）

話說中秋節除咗追月，仲可以追星，講緊嘅係明星月餅呀！今年，有唔少藝人朋友都推出自家品牌嘅月餅，當中有傳統口味、有冰品，仲有破格嘅曲奇，各位粉絲，你哋準備好未先？

月餅

李家鼎古法奶黃月餅

圖：烘焙工坊-古法奶黃月餅「李家鼎作品」Facebook

晚晚睇住鼎爺教整餸，有時都會想有機會試下佢手勢，而家機會嚟喇飛雲，烘焙工坊同鼎爺合作，推出古法奶黃月餅，用上清末廣州粵式茶樓嘅奶黃配方，相信味道應該都會幾香濃。月餅首賣當日3個鐘內已經賣晒，而家有加推嘅，但都應該係手快先有。

購買地址：
北角英皇道395號僑冠大廈地下22號舖
香港太古英皇道1098號寶峰園地下1號A B鋪

陳敏之紅棗、薑汁月餅

陳敏之同朋友開嘅餅店，平時賣開曲奇，嚟緊中秋就會出月餅，有三款唔同嘅系列，分別係奶黃、健康同榴槤系列。奶黃系列有柚子、流心金沙味；健康嘅有紅棗、薑汁等。最快就可以喺聽日開始嘅美食博覽度買到，如果唔係，去返餅店分店都得。

購買地址：
美食博覽**尊貴美食區**（Blesscuit 攤檔：3B-F08）、
Blesscuit分店

古巨基軟心芝士奶黃手工月餅

基仔嘅餅店都有出月餅，金箔手工奶黃月餅賣相精緻，有啲食用金箔點綴下。另外仲有獨家首創嘅軟心芝士手工奶黃月餅，分咗三層layer嘅，牛油餅皮啦，法國奶油打造嘅奶黃啦，最中間就係意大利軟心芝士，加熱後暖暖地食又得，雪凍佢當雪糕咁食都得。

黎明紫無花果月餅

圖：黎明 Leon Lai Facebook

明蝠俠都加入月餅大軍嘅行列，係自創嘅紫無花果月餅。錯過咗早幾輪預訂嘅朋友仔，唔使咁sad，佢喺facebook度咁講：「呢個世界唔係咩都有2次機會，不過今次有」，但就等耐少少，9月底前先有得拎。

冰皮

肥媽芝士冰皮系列

肥媽都曾經做過唔少飲食節目，亦教過人整月餅，今年終於推出自家品牌，用獨門秘方創作咗一系列嘅芝士冰皮月餅。一盒七星伴月，隻隻口味獨特。最新奇嘅一定係最大嗰嚿，海鹽煙肉味，食落有啲似Carbonara嘅感覺。另外有fresh啲嘅柚子、香檸；甜口啲嘅脆脆朱古力、果仁系嘅開心果等等。

部分購買地址：
美食博覽（Wealthy Making Limited攤檔：1D-A24）、
BONJOUR 分店（8月22日 – 10月4日）、
da dolce Gelato Italiano（8月22日 – 10月4日）

月餅曲奇

鄭欣宜月餅軟曲奇

如果大家仲記得，欣宜嘅曲奇餅店，上年出咗幾款月餅軟曲奇。今年都有呀，味道亦同上年一樣，都係蓮妹白蓮蓉蛋黃月餅軟曲奇、青天奶黃蛋黃月餅軟曲奇。曲奇餅皮軟得嚟又幾煙韌，牛油味香，內餡甜度適中。

謝霆鋒月餅曲奇

同樣都係月餅曲奇，但霆鋒曲奇嘅外形同味道都好唔同。鋒味月曲奇真係成個月餅咁樣樣，牛油曲奇皮，而入面嘅餡就同茶味結合，一盒有齊原味同伯爵茶味，兩者茶味都幾香，後者就相對甘澀少少。不過又唔淨係得茶味喎，兩款口味都保留返傳統嘅粒粒蛋黃同蓮蓉喺中間，估唔到同茶味都幾夾啊。

文：Kar