正所謂一年之計在於春，17年想慳返啲錢，食方面可以考慮一下去熟食中心。北河街市政大廈嘅熟食中心唔單止因為位於深水埗所以價錢相當親民，仲要喺16年年底先啱啱裝修好重開，光猛咗又乾淨咗。計CP值嚟講，有機會問鼎全香港最抵食嘅熟食中心呀！
街坊價神級Pho 芽莊城越南牛肉粉
神級呢個名唔係開飯仔我亂改，而係唔少食家畀呢間店嘅稱號！老闆夫婦係越南華僑，可想而知佢地嘅越南河粉會幾正宗。生牛肉湯檬粉嘅湯底清澈鮮甜，半熟牛肉粉紅嫩滑。唔食生牛肉嘅就必試越式蝦膠扎肉蕃茄湯米粉，兩碗都有配青檸同辣椒粒。最後嗌多杯滴漏咖啡，用煉奶代替砂糖，香味特別濃郁醇厚。
另一間維記豬潤麵 維記咖啡
講到豬潤麵，唔少人都會先諗起維記咖啡粉麵，但其實同區呢一間茶餐廳形式嘅檔口都有豬潤麵！雖然有食家話佢地嘅豬潤水準有少少飄忽，有時候會過硬。但最重要嘅湯底，正確啲嚟講係啲泡，仲保留到喺度！其實啡色飄喺湯上面嘅係新鮮豬潤血水煲熟咗嘅泡泡，鐘意食豬潤麵嘅一定會飲埋啲湯。其他下午茶亦相當抵食。
水準平民泰國菜 泰金文
遲啲天氣轉熱嘅時候就啱哂食泰國菜，酸酸辣辣咁開胃吖嘛。先嚟一碟透明光滑嘅泰式生蝦做小食，唔想食生嘢嘅話惹味嘅沙嗲串燒亦係一個好選擇。主菜可以嗌返碟青咖喱，辣味唔重反而仲帶少少甜味，平時唔太食辣嘅都可以一試。重點係配埋金黃香脆嘅蒜蓉包，就咁食都夠蒜蓉香，點埋咖喱汁更爽歪歪。
茶記小炒樣樣得 東記咖啡茶餐廳
香港人其中一種精神就係夠靈活變通，呢間茶檔可以話係例子之一，早市同午市佢係一間茶餐廳，但到晚市唔少街坊會嚟食小炒，而且仲歡迎你去樓下街市自己買餸再交畀店家加工。佢地嘅早餐夠抵食，方包仲可以轉菠蘿包；午市就可以食炒粉麵飯，保證鑊氣十足；晚市就可以食少年食神林澄光推薦過嘅椒鹽鮮魷同蝦仁炒蛋。
送酒小菜+燒鵝 大利美食中心
夜晚想食鑊氣小炒嘅話，仲有呢間大利，無論裝修前定裝修後呢度都有種味道：麻甩味。無他嘅，唔少食客都係上咗年紀嘅男士，最鐘意夜晚同朋友嚟叫幾碟小菜再飲啤酒。所以呢度唔少小菜都係送酒一流，例如胡椒鹽水浸豬手，軟腍得嚟又夠鹹，又例如幾乎係每枱必嗌嘅燒鵝，真正皮香肉滑。
平實窩心粥店 祺記
圖：阿打
粉、麵、飯都介紹過，最後又點少得粥呢？呢間粥店嘅粥底夠綿滑，無論配碎牛、豬潤、魚片定皮蛋瘦肉都咁夾。落埋薑絲同葱粒吊味，最緊要係碗粥夠熱辣辣，冬天暖胃一流。一碗粥唔夠嘅話可以叫多碟炒米粉，材料唔算多但勝在有鑊氣唔會太碎。但溫馨提示一句，呢度嘅油炸鬼質素就一般，可以留肚唔洗試炸兩。
文：Cathy
開飯編輯推介：
2. 11月份好評餐廳十強
熱門文章推介：
隨時接收最新資訊
讚好OpenRice專頁！