舊不如新，並非定律。有潮州粉麵店第二代，為保留傳統粉麵文化，逆市開冰室；又有人以舊木船木門、紅酒箱打造莊園餐廳。呢兩間「咪嘥嘢食店」將舊文化同舊物注入新意，結合惜舊惜食文化，實踐環保理念。

打開OpenRice 進入「進階搜尋」，喺「食品/餐廳類型」可以搵到「咪嘥嘢食店」。

大家平時都可以經OpenRice 進階搜尋，搵出更多「咪嘥嘢食店」㗎！依啲食店都願意實踐環保，主動減少剩食、廚餘。平時多啲幫襯佢哋，以行動支持有心食店啦。

【同一餐室】潮州粉麵第二代　新舊融合
疫情下喺土瓜灣新開業嘅「同一餐室」，係九龍城潮州粉麵老字號「德昌魚蛋粉」嘅第二代。「同一餐室」負責人眼見年輕人好少食潮州粉麵，所以想開間新式冰室融合新舊飲食文化，喺度可以食到傳統魚蛋粉；又可以嗌份芝士沙嗲牛肉撈公仔麵。

九龍城老字號第二代，開設「同一餐室」傳承潮州粉麵味道。

混蛋多士，爆料炒蛋、雞扒、芝士。呢度有老字號粉麵，又有新式料理。

電子系統　了解食客口味控貨量
咁潮州粉麵又啱唔啱年輕人口味呢？餐廳特別引入電子落單系統了解食客喜好，發現粉麵其實好受歡迎。當致力傳承嘅文化有人欣賞，絕對係最大嘅鼓舞。

電子系統亦有助餐廳按照客人偏好同點餐率控制入貨量，減少食材腐爛同過剩問題，係減廚餘嘅一大幫手。

電子落單系統有助了解食客口味、控貨量，原來魚蛋粉依然大受歡迎。

潮州粉麵文化　扣底吖唔該！
近年愈嚟愈重視惜食文化，好多人主動嗌少飯少麵減少浪費。其實潮州粉麵一早就有呢個「扣底」文化，即係我地所講嘅少麵。雖然年輕一代對「扣底」一詞較為陌生，但員工都會耐心地解釋扣底嘅意思，鼓勵食客如果知道自己食唔曬就記得嗌「扣底」。

潮州粉麵早有扣底文化，鼓勵食客少麵減剩食。

電子落單　有助避免過量點菜
QR Code 電子落單亦更方便客人按喜好揀選扣底、少青、走冬菜等要求，負責人提到：「好多客人面對面落單時，會唔好意思提出太多要求。而家佢哋可以自己喺電話度慢慢揀，就能夠隨心所欲喇。」

父母傳授　足料湯底零浪費
一碗粉麵嘅靈魂源自湯底，「同一餐室」湯底沿用九龍城老店秘方，店主父母傳授以原隻雞同豬骨等熬煮嘅秘法。豬骨連肉熬出肉味，用盡一骨一肉唔浪費。清湯底亦都唔會太濃，主要突出食材鮮味。

自家湯底用盡食材熬煮零浪費，唔會太濃以突出食材鮮味。

每日手打門鱔魚蛋　做得好食自然唔會嘥嘢　
呢度嘅魚蛋由父母一代開始，每日人手用門鱔打成，入口彈牙有魚味；而魚片頭就由店舖即炸製成，香口爽彈，坊間雪藏貨根本難以媲美。當街坊食客欣賞菜式嘅滋味，自然會食晒啲嘢唔做大嘥鬼啦。

店內有新鮮手打丸賣。店家整得好食，食客自然食晒唔做大嘥鬼啦。

自家辣椒油都有得賣！店內其他醬汁以瓶器代替獨立包裝，更環保。

【Factory 99】舊木變新　打造莊園餐廳
速食文化下，連傢俬都快買快換，好多傢俬只用幾年就掉棄，其實好多舊木都可以翻新再用㗎。觀塘「Factory 99」佔地寬敞，所以老闆初期劃分咗一個空間售賣紅酒，剩餘嘅紅酒箱同紅酒塞就用嚟做裝飾，非常環保又有格調。

紅酒箱木板修飾窗戶，環保又有格調。

牆壁以紅酒塞裝飾，更有空間感。

老闆好鍾意四出尋寶，買入翻新枱凳同餐具。唔同年代、出處嘅家品意外地和而不同，就好似一場貼地嘅古玩展。其中一張大木枱，點估到前身係一艘木船，木料厚實有質感，經翻新後成為一張有故事嘅木枱，環保得嚟仲好唯美。

木船木料厚實，翻新後變成一張有故事嘅長木枱。

手功精緻嘅大木門，都可翻新成長枱。

少飯少意粉　沙律走肉都係惜食第一步　
老闆重視環保，亦相當惜食。無論午市、晚市都提供少飯、少意粉選擇，減少廚餘剩食。沙律更可選走肉多菜，做到低碳足跡。因為蔬菜瓜果嘅生產過程所消耗嘅能量比畜牧業低得多，所以平時多食蔬菜係好環保同健康㗎。

芝士焗豬扒飯。即叫即焗，Mozzarella 極拉絲！可按自己喜好揀少飯。

善用剩餘食材　醬汁原汁原味
烹調過程亦善用剩餘食材，如剩牛骨用作煮製燒汁、黑椒汁等；切淨嘅豬肉、豬骨就熬煮中湯。平時我哋成日丟掉嘅檸檬皮、橙皮，原來可以用嚟煮甜酸汁。老闆仲特別保留一堆剩餘檸檬皮，畀員工拎返屋企自製洗潔精，可以有效清理油污，抹爐、抹抽油煙機、抹枱抹櫃都得。

紐西蘭牛柳扒。有牛骨煮嘅醬汁，沾汁後更香濃！

適當貯存食材　避免腐爛浪費
要減少廚餘，食材貯存方法都好重要。控制時間、溫度、衛生先可避免腐壞浪費。呢度按「先入先出」原則，將舊貨放喺當眼處，由舊至新咁使用存貨避免過期。同時有滅蟲公司定期防治蟲鼠，防止食材受污染。除咗源頭減廚餘，老闆亦好希望將來可以同機構合作回收廚餘，為環保出一分力，以自身推動可持續發展。

歡迎自攜外賣器皿
疫情期間，唔少人都選擇外賣。「Factory 99」都好歡迎食客自攜器皿，減少即棄外賣盒或餐具。近年大家都有減塑意識，其實疫情前餐廳每星期都會推行走飲管日，但礙於疫情暫時取消，不過大家都可以主動要求走飲管㗎。

餐廳好歡迎食客自攜外賣器皿、走飲管，齊齊走塑。

嚟到必食菠蘿芝士美國牛肉漢堡。自家手打漢堡肉特別彈牙、重肉味。