於2022年，香港每日棄置約3,300公噸廚餘在堆填區，大概佔本地都市固體廢物嘅三成。想減少廚餘，我哋平時食飯「唔嘥嘢」、珍惜食物、減少剩食都得㗎。
香港而家有好多餐廳都參加咗「咪嘥嘢食店計劃」，願意主動減少廚餘和剩食，同時向食客傳達惜食嘅信息，一齊「咪嘥嘢」。而家只要喺OpenRice搜尋餐廳，揀「進階搜尋」及「食品/餐廳類型」，就可以搵到「咪嘥嘢食店」。平時搵餐廳開飯時，不妨多啲支持佢哋，為環保出一分力。
經OpenRice搜尋餐廳時，揀選「進階搜尋」及「食品/餐廳類型」可以搵到「咪嘥嘢食店」。
【晉家門炭燒工房】上網自學製天然酵素
呢間由3位中學同學一齊開設嘅太子小店，希望大家嚟到都好似「進家門」一樣，可以輕鬆自在咁用餐。佢地嘅招牌香草燒春雞吸引咗好多人慕名而嚟。燒春雞即叫即焗，原隻上枱一撕開即刻流出滿滿嘅肉汁。由於焗製需時45分鐘，食客可以提早致電落單，咁樣嚟到坐低就有得食啦。
招牌香草燒春雞即叫即焗，啖啖肉。
集中準備食材 獨立密封免變壞
小店附近人流唔多，所以每星期都會主推兩款特價餐，集中準備幾款食材，減少浪費。呢度亦有提供好多手工啤酒，串燒作為佐酒神物都好受歡迎。店家串好串燒之後，就會用保鮮紙獨立密封，直至收到訂單先按照訂單數量，逐串拎出嚟燒製，咁就可以減少整盤食材不停進出雪櫃，因溫度差異而變壞要丟棄。
多款串燒配手工啤。
獨立密封食材，減少進出雪櫃頻率避免變壞要丟棄。
延續剩食生命
就算老闆嚴格控制貨量，都會無可避免產生不可食用嘅餐前廚餘，例如水果皮、蝦殼、蛋殼等。老闆娘特地上網自學，將橙皮加埋梳打粉自製成天然酵素並存好。需要時直接倒入廁所，就可以簡單清潔去水位喇。
(左)咖啡渣浸水發酵作液體肥料；(右)橙皮加梳打粉製成天然酵素清潔劑。
而蕉皮、檸檬皮、蝦殼、蛋殼等廚餘，可以混合泥土發酵約半年作肥料。老闆娘話做法比想像中簡單，只要用垃圾袋存放所有發酵材料，直至所有材料腐化融入泥土就可以用嚟施肥㗎喇。
天然肥料泥土可以用於家中盆裁，老闆娘更索性於店內種植香草—羅勒、薄荷葉等，即摘即煮更富香氣。
以自製天然肥料於店內種植香草，即摘即用都可減少浪費。
將剩食混合泥土發酵，妥善保存就可自製天然肥料。
花心思盡用食材 剩食變美食
平時熟客預訂「晉家門炭燒工房」到會服務，店家會將平時大圓形薄餅，切成一小口長形薄餅，當中不免有多餘薄餅皮剩下。店家都會將剩餘薄餅皮鋪上配料，焗成小薄餅當員工福食，為不起眼嘅剩食升級，盡力減少浪費。
(左)剩餘薄餅及麵包，鋪上配料焗製變成員工福食。
(右)當日特價餐剩餘炸雞、薄餅皮、鷹嘴豆，變成富中東風味嘅員工福食。
將變硬嘅麵包浸入雞蛋同牛奶，焗製成麵包布甸同員工分享。
按自己食量揀份量
我哋食飯「咪嘥嘢」，最直接就係按自己嘅食量嗌嘢食。所以店家亦貼上「咪嘥嘢」海報提提大家。老闆娘笑言，曾有熟客次次嚟食意粉都食唔晒，終於有日主動問佢想唔想少意粉？估唔到熟客又好樂意。平時我哋嗌嘢食之前，都可以諗吓所需食量㗎。
店內貼上「咪嘥嘢」海報，提醒大家可主動要求少飯及少意粉。
【Hidden和洋食屋】盡用食材 蔬菜熬湯煮汁都得
「Hidden和洋食屋」位於九龍灣商業區。呢間日式小店入面貼滿和風海報，好有居酒屋嘅氣氛，深受附近上班族歡迎。店內嘅經典遊戲機同老虎機都同樣搶眼，老闆話事緣係見到附近商舖準備棄置呢兩部機，於是就膽粗粗問可唔可以接收。有時環保就係咁巧合，將舊物傳畀下一手延續情懷，同時又可減少廢物棄置量。
「Hidden和洋食屋」充滿日和氣氛。
承傳舊物，延續情懷又可減廢。
由於午市大部分食客都係附近上班族，客流穩定，所以店家記錄數月食材用量後，每日都可準確控制新鮮食材嘅入貨量。基本上可以盡用90-95%食材，減少浪費之餘，新鮮食材入饌自然更好食。
日本料理用到嘅食材變化唔大，以日式咖喱為例，主要有洋蔥、甘筍、蔬菜同咖啡。蔬菜亦可用作滑蛋豬排飯嘅雜菜，而蔬菜嘅頭頭尾尾都唔使掉，可以用嚟熬湯同煮醬。
新鮮蔬菜煮製咖喱。
蔬菜用途繁多，諗多步就可用盡食材煮咖喱、雜菜、熬湯及煮醬。
QR Code 落單 食幾多 自己揀
餐廳用QR code電子自助落單，並提供少飯、少汁、走餐湯等自訂選項，方便食客按自己食量「食幾多嗌幾多」。而午市就有多款丼飯選擇，溫泉蛋炙燒三文魚牛油果丼集合富Omega3 嘅三文魚；以及含不飽和脂肪酸、豐富維他命B1、B2嘅牛油果，大受上班族歡迎。
午市有多款丼飯選擇，溫泉蛋炙燒三文魚牛油果丼大受歡迎。
QR code木牌可循環再用，減少廢紙量。
電子落單提供少飯、少汁、走餐湯等自訂選項，可按自己食量「食幾多嗌幾多」。
晚市最高人氣就有超巨炭燒原條鰻魚蛋包飯，鰻魚夠晒厚肉肥美。壽喜燒套餐則有滿滿嘅蔬菜鍋物，可以自行放入牛肉滾住食，暖笠笠最啱冬天食。同場更有投射大螢幕播放電影，星期五不時有Live Band好有氣氛。
炭燒原條鰻魚蛋包飯，有超巨鰻魚好肥美。
人氣壽喜燒套餐，鍋物配料豐富，冬天食暖笠笠。
按食材類型 控制雪櫃溫度
因為蔬菜、肉類貯存溫度有異，如果處理不當，好易變壞造成浪費。所以店家特設3部唔同溫度嘅雪櫃，分別以-4°C、0°C、4°C 貯存未切肉類、已切肉類、蔬菜。配合定期防治蟲鼠措施，以延長食材保鮮期，避免食物因污染或腐爛而棄掉。
蛋殼富鈣質 適當處理成貓狗飼料
店主重視延續廚餘生命，並冇棄置每日剩餘嘅蛋殼同咖啡渣，反而會將佢哋巧妙地重用，同食客一齊賦予廚餘新生命。唔講唔知，原來雞蛋殼係高鈣低磷嘅天然食材，洗淨及適當處理後加入貓狗日常飼料，有助主子骨骼發展。店主特意將蛋殼清洗乾淨，畀食客拎返屋企經適當處理後，打碎混入貓狗飼料中為主子補鈣及營養。同時店主又將咖啡渣放入器皿保存，食客可以拎返屋企放於雪櫃、食物盒或鞋櫃中除臭吸濕，或混入泥土作天然肥料。
店主將蛋殼清洗乾淨，畀食客拎返屋企適當處理後作貓狗飼料。
「綠在區區」回收好方便
好多人因為童年情懷，鍾意飲玻璃樽汽水，喺「Hidden和洋食屋」都有得飲㗎。不過玻璃屬惰性物料唔會自然分解，日積月累隨意丟棄，會耗用堆填區。
雖然小店人手唔多，但店家每日都努力洗淨玻璃樽，自行拎去「綠在區區」回收。大家不妨效法店家，平時屋企用完嘅塑膠、金屬、電池等，整理乾淨後都拎去「綠在區區」回收㗎。去「綠在區區」回收，可以透過手機應用程式或綠綠賞積分卡獲取積分，以換取小禮品如麵食、調味料、毛巾等。綠綠賞會員亦可選擇捐贈綠綠賞積分予指定嘅慈善機構，幫助有需要人士㖭。
小店人手唔多，但依然堅持清洗各種即棄器皿前往「綠在區區」回收。