近期環保界KOL「大嘥鬼」嘅高質帖文吸咗好多粉絲，大家都想跟鬼鬼一齊惜食唔嘥嘢，減少廚餘嘅產生。想好似鬼鬼咁叻，最簡單就係經OpenRice搜尋「咪嘥嘢食店」，多啲支持願意減少剩食、善用食材、同實踐環保嘅餐廳。除咗幫襯「咪嘥嘢食店」之外，平時都唔好眼闊肚窄，要餐餐清晒枱面嘅飯餸～咁就最惜食喇！

打開OpenRice 進入「進階搜尋」，喺「食品/餐廳類型」可以搵到「咪嘥嘢食店」。

搜索香港「咪嘥嘢食店」
香港有超過1,000間「咪嘥嘢食店」，基本上你想食咩都有。今次我哋搜羅咗3間唔同種類嘅餐廳，即刻睇吓佢哋點樣惜飲惜食喇！

【Peek-a-poke】魚生每日新鮮送到，絕不嘥嘢！
夏威夷魚生飯Poke Bowl 一向好受歡迎，呢間“Peek-a-poke” 自由度極高，可以自由選配魚生、配料同醬汁，所有食材都勁新鮮，齋睇個樣都已經覺得好吸引。

自選吧有多款新鮮配料選擇。

識揀一定揀少飯
自選吧有咁多配料揀，唔覺意嗌多咗都唔出奇～鬼鬼曾提醒大家莫貪心，食幾多先嗌幾多。如果真係樣樣配料都想試，店家都有提供少飯選擇，等大家留肚狂掃魚生。

驚食唔晒但又想試多幾款配料，可以揀少飯㗎。

控制魚材貨量減廚餘
魚生要新鮮，當然唔可以留過夜喇，所以控制入貨量係好關鍵㗎。店家會留意食客口味，每日訂購適量食材，盡量減少浪費。

魚生不宜過夜，要適當控制入貨量，避免造成浪費。

留意食材賞味期限
除咗控制好入貨量之外，所有食材都會按「先入先出」嘅原則，將舊貨擺放喺當眼處，由舊至新使用食材存貨，避免拖到過期搞到嘥晒啲嘢。

魚生最重要係乾淨衛生，所以“Peek-a-poke” 會定期聘請滅蟲公司消毒滅蟲，等大家食得放心之餘，仲可以避免食材因為受污染而要掉晒。

“Peek-a-poke” 定期消毒滅蟲，確保環境同食材衛生安全。

“Peek-a-poke” 有咩食？
“Peek-a-poke”主打健康好食嘅夏威夷刺身飯，根據gluten-free無麩質飲食、keto-diet生酮飲食設計餐單。店家有5款招牌刺身飯，即刻睇吓邊3款最高人氣喇！除咗5款招牌刺身飯之外，餐廳亦有提供唔同嘅素菜選擇。

人氣招牌之一「加州風味CALIFORNIA」有刺身三文魚、青瓜、雞蛋絲、三文子魚子，再配上香濃果仁芝麻醬。

三文魚又肥美又大份，滿足晒魚生控嘅要求。

日常生活多菜少肉，可以減碳之餘又食得健康。呢度嘅多菜選擇有“Go green”，滿滿嘅刺身三文魚配上青瓜、車厘茄同蜜糖香醋汁，口感同味道都好豐富。

三文魚配上青瓜、番茄，口感好豐富。

同場亦有素食選擇「香菇素素」，鋪滿香菇、青蔥、海帶芽同豆腐，最後喺醋飯淋上香菇汁，開胃又有營養。

夏威夷刺身飯都有素食選擇㗎。

【泰亞萊】泰式海南雞　雞骨煲湯用盡全雞！
呢間由泰國師傅主理嘅20年老字號，主打正宗泰式無骨海南雞。佢哋每日都賣出大量海南雞飯，仲要做到接近零廚餘，到底師傅係點樣用盡成隻海南雞㗎？！

雞胸雞髀用嚟起骨做海南雞飯，咁剩低嘅雞骨呢？原來可以用嚟煲雞湯；加上蔬菜按每日用量入貨，避免浪費，咁就可以將廚餘減到最少喇。

20年老字號「泰亞萊」由泰國師傅主理，主打海南雞飯。

雞骨無浪費，全雞用盡，熬湯更濃郁。

少飯·半飯·仲有得轉菜底！
呢度嘅飯底選擇都好貼心，可以揀少飯、半飯，甚至走飯轉菜底，收銀處都有貼上咪嘥嘢貼紙提醒大家㗎。

當眼處貼上「惜食香港」貼紙，溫提食客咪嘥嘢。

湯粉類都有唔同選擇—金邊粉、米粉、米線，所有粉麵都會乾爽存放喺雪櫃；大米就放入密實米桶，需要時先拎出嚟浸水備用，確保食材唔會受潮浪費。

大米放入米桶，保持乾爽延長保鮮期。

歡迎自備餐盒·餐具　一齊走塑環保
「泰亞萊」作為連鎖外賣店，出餐速度快，吸引好多上班族，但無可避免都會有外賣包裝，所以員工都會主動詢問需唔需要餐具，同時好歡迎大家自備餐盒。

「泰亞萊」有咩食？
必試「泰式無骨海南雞」係用接近3斤重嘅三黃雞，雞皮爽彈、雞肉嫩滑，去埋骨啖啖肉呀。食雞時蘸埋秘制泰式醬，令雞肉嘅鮮味提升。

「泰式無骨海南雞」係用三黃雞，雞皮特別爽彈，記住配埋20年秘方泰式醬再惹味啲。

同場仲有滷水豬手飯、泰式咖喱蟹肉飯等，親民價幾十蚊就食到，方便抵食。

「滷水豬手飯」豬皮軟Q啖啖肉。

「泰式咖喱蟹肉飯」濃郁咖喱汁撈飯一流，爆量蟹肉好驚喜。

【Follow】田園西餐　善用食材更好味
 “Follow”係一間以木系設計為主嘅西餐廳，門口擺放咗唔少植物，好似置身喺田園裡面一樣。餐廳重視大自然，堅持用盡所有食材，同時致力回收廚餘、咖啡渣同樽罐。

“Follow” 重視大自然，環境好有田園感。

唔知你有無留意到，佢哋嘅西餐由熱湯、沙律到主菜都會充分利用所有食材，“Follow”大廚Don介紹：「我哋有燒美國封門柳，封門柳中間條筋太韌會起走，用嚟煮羅宋湯會好香肉味。另外燒安格斯牛扒又會切出肥肉，好啱用嚟煮肉醬意粉，因為肥瘦肉撈埋先好食㗎。」

肉位太韌太肥，原來可以煲羅宋湯、煮肉醬。

原來一件牛肉都可以有咁多煮法，咁海鮮呢？Don 就話「龍蝦頭同尾好似無用咁，其實可以將佢哋焗香後，加入忌廉、檸檬、茄汁等煮成龍蝦海鮮醬，唔會浪費之餘，又比一般嘅現成醬料更加香濃鮮甜。」 

乾淨衛生處理食材，就算海鮮殼、菜頭菜尾都可以煮醬煮湯。

素食都可以好好食　健康減碳　
Don本身有做過素食餐廳嘅經驗，所以嘗試引入各種素食菜式，令大眾更多機會接觸素食，例如牛肝菌飯、菠菜素芝士意粉等，其實都好香濃滿足㗎。

「白松露意大利飯」其實素食都好滿足。

收集咖啡渣　堆肥種植回歸自然
店內一片綠油油，用餐心情都更悠閒輕鬆。餐廳嘅植物都係用咖啡渣嚟做堆肥，相比化學肥料更加環保。

“Follow”回收咖啡渣為植物施肥，將廚餘回歸大自然。

餐廳同時將酒樽、鋁罐、膠樽洗淨分類，方便回收。

年尾Party Time！橙皮·檸檬皮都有用
講到環保，平時成日見嘅橙皮、檸檬皮都好有用㗎。餐廳會將佢哋打碎，加入茄蓉煮意大利醬。咁我哋喺屋企又可以點做呢？如果年尾搞party可以將佢哋加埋梳打水同水果做西班牙傳統飲品Sangria，好有節日氣氛。

除咗飲飲食食之外，檸檬皮仲可以用嚟自製洗潔精，咁party之後清潔屋企就有天然檸檬香喇。

橙皮同檸檬皮有好多用途，可以調酒同清潔㗎。

“Follow”有咩食？
大廚會由世界各地引入高質肉扒，必試「燒美國封門柳」，軟嫩重肉味；「燒西班牙黑毛豬鞍」更有種獨特橡果香，肉質鬆軟有油花。鍾意打卡嘅就必嗌「德國火焰豬手」，店員會喺你面前即席點火，即燒即食勁脆呀。

「燒美國封門柳配薯菜」封門柳出名肉味勁濃。

「燒西班牙黑毛豬鞍架配薯菜」豬鞍架好大隻，仲有獨特橡果香。