【瞬間看地球】環球聖誕食呢啲

一講起聖誕大餐，可能你就會諗起火雞，不過，原來唔係全球嘅聖誕大餐都食火雞㗎！而家就等等我帶你哋瞬間看地球，睇下其他地方啲聖誕大餐有咩好西食啦！

英國

圖：新華網
火雞都係英國傳統會食嘅聖誕美食，不過，佢哋有特別嘅食火雞方法㗎，就係會用隻火雞嘅三叉骨嚟許願嘞，所以嗰嚿骨又會叫做「許願骨」。許一個願都唔容易㗎，首先佢哋要兩個人一組，一人拎住嚿骨嘅一邊，然後就好似玩扯大纜咁，邊個扯得大嚿啲就成功爭取到許一個願！

除咗火雞，英國人另一樣聖誕必食嘅就係黑麻麻嘅聖誕布甸，其實即係將啲麵粉、提子乾、白蘭地、黑糖漿等等溝埋一齊蒸，鍾意嘅仲會擺個一蚊銀仔落去，邊個食到就下年有運行喎。

美國

圖：新華網、wine-world
相傳美國係火雞嘅起源地，而除咗火雞之外，佢哋嘅大餐仲會食粟米粥。呢碗粥特別在於面層仲會有一層奶油，再放啲果仁，食落香甜得嚟又有啲咬口。

美國人仲鍾意喺聖誕期間飲蛋酒（Eggnog），將啲牛奶、雞蛋同糖攪勻。雖然佢叫蛋酒，但其實唔加酒飲都一樣得，鍾意嘅都可以自加白蘭地、威士忌、rum酒乜都得，飲落甜甜der好有奶味。

德國

圖：維基百科、DW、Fotolia/ Brigitte Bonaposta
今日啲囡囡好畀心機，整到塊塊都唔同樣嘅薑餅，就係德國嘅發明物，最初嗰陣係用蜂蜜同胡椒粒整成圓咕碌嘅餅，甜中帶辣，後嚟先慢慢被進化到今日呢個薑餅人樣，又好食又好睇。

德國人出晒名鍾意飲酒，聖誕又點會冇酒飲吖？熱紅酒就係大熱之選嘞。紅酒加糖再加香料，但千祈唔好因為飲落好甜好易入口，就大啖大啖咁隊晒佢，好易醉㗎！

另外，喺聖誕前嘅四個禮拜，德國人已經開始為聖誕倒數。佢哋會有個倒數日曆，每日都有個袋，袋住朱古力或者糖，過一日食一粒，食到聖誕嗰日就可以食大餐！又幾開心喎，香港人成日都倒數呢樣倒數嗰樣，可以諗諗佢，例如每日倒數放工咁咪每個鐘都可以食粒糖囉~~

捷克

圖：czechfolks
聖誕個個都大魚大肉，捷克都係。捷克人聖誕會食鯉魚㗎！好似話係因為以前啲祖先加多咗魚塘養多咗魚喎。而家呢，佢哋都會保持呢個傳統，臨近聖誕就買條新鮮嘅鯉魚養住喺浴缸，去到平安夜先至整嚟食，啲魚鱗仲會留低一片放喺皮夾度，希望下年會好運。

法國

圖：huixiao
眾所周知，法國聖誕都會有樹幹蛋糕。但點解會係樹幹呢？原來係因為以前嘅法國人，聖誕前會喺個壁爐度燒柴，仲要有咁粗得咁粗嘅柴，要燒足12日，咁下年就會豐收，後嚟就用樹幹蛋糕代替咗。

日本

圖：eurokulture、japanzine
聖誕節就是要吃雞。不過，英國食嘅係火雞，日本食嘅係炸雞，仲要係肯德基嘅炸雞。相傳係因為70年代有個外國人表示喺日本冇火雞食，然後用KFC炸雞代替，再然後就畀KFC拎咗嚟做宣傳，再再然後就變咗傳統囉！喂，聖誕嗰陣，仲使乜出街排隊等食飯吖，218，5個0啦！

嗱，我都知聖誕機票太貴，你哋冇去飛走㗎喇。睇完環球聖誕美食之後，食返啲當地應節食品，咪當自己去咗旅行，囉。

資料來源：Tacocity、Time、DW、ETToday、iGospel

文：Kar

隨時接收最新資訊
讚好OpenRice專頁！