1蚊克羅地亞松露醬 味高美（3E-E09）
唔好以為1蚊就只係可以買到平嘢，行得快，分分鐘連松露醬你都買到！Like個facebook專頁，就可以用1蚊買50g嘅黑松露醬，不過每日名額有限，廿個，睇你夠唔夠快啦。1蚊買唔到黑松露醬，都仲有第二個機會嘅，松露炒蛋啦，都係1蚊，不過都係每日得廿個。
啲Zigante Truffle松露醬呢，克羅地亞嚟嘅，陣味都幾香濃，而且都last得幾耐，用唔到1蚊買嘅，用返會場價$60都買到，另外仲有白松露醬，同黑松露片。
優惠：每日20個名額
1蚊N隻溏心鮑魚 安記海味（1C-B10）
1蚊N隻鮑魚，即係幾多隻？唔知呀，要睇你功力喇。話說今年安記會有棵3.5米高嘅許願樹喺攤位度，第1日頭10名喺場外排隊買飛入場嘅朋友，畀1蚊就可以有1次拋福袋嘅機會，咁就根據你福袋鈎中嘅位置，睇你有幾多隻嘞，最多嘅話可以有成168隻㗎，眼界差少少嘅最少都可以有12隻。
另外，佢哋都有款新出嘅鮑魚，叫QQ鮑，細隻啲嘅，專for小朋友，即開即食係方便嘅。
優惠：首日10個名額
1蚊紐西蘭蜂蜜 德鴻行國際有限公司（1B- C02）
平時1樽最平都賣百零蚊嘅蜂蜜，而家1蚊就買到喇，只要你係每日頭10個嘅顧客，就有機會得到喇。1蚊可以換購到嘅仲有去蒂金錢菇、意大利鳥結糖、伊朗鹽焗開心果、韓國高麗人參糖。不過聽講係隨機派嘅，換唔換到蜂蜜就睇你彩數喇。
介紹返，蜂蜜係由紐西蘭直送嘅，100%天然，連人造糖都冇，但食落依然都咁甜，冬天就潤喉，夏天一樣可以清熱解毒。檔口仲有樣值得留意嘅嘢食：開心果。佢嘅開心果有咩咁特別？伊朗嚟嘅，仲係紅色㗎添！點解嘅？原來係入罐嗰陣冇好似平時綠色嗰啲咁剝咗衣，食落果仁味更香口。
優惠：每日10個名額
1蚊100粒燒賣 陳記食品（1A-C17）
有時行街口痕，想拮串燒賣食，閒閒地都7、8蚊得4粒，而家1蚊有100粒魚蓉燒賣呀！不過，要自己叮熱囉，但真係抵好多喎，買咗返去成班同事開心些牙食都好。名額10個，仲要係淨係第1日（8月11號）先有咋，要平買燒賣都唔係易呀。
檔口仲有好多其他中式點心，好似馬拉盞呀奶黃包呀壽包呀粉果呀等等，全部新鮮即做即入袋，所以都幾保留到原本嘅鮮味，但就食用期限比較短，買咗要快啲食晒佢。
優惠：首日10個名額
1蚊不鏽鋼平底鑊 優質標誌局（Q嘜）（1A-A15）
1蚊1隻鑊？係，建樂士不鏽鋼平底鑊嚟，不過幸運兒得5個，另外仲有30個人可以得到雙喜牌百花蜜。都係唔夠快？唔緊要，佢哋有超過1000份免費派發嘅禮物呀，包括有榮華冰皮月餅券、同珍特級蠔油、金象牌茉莉香米等等。
詳情
開放時間（美食博覽）：
8月11-14 日：10:00am – 10:00pm
8月15日：10:00am – 6:00pm（只限公眾館，尊貴美食區不開放）
地點：香港會議展覽中心（順帶一提，嗰頭好似好多伊貝捉）
門票：
「美食博覽公眾館」門票：$25/張 （晚間進場票：$10/張）
套票（包括「美食博覽公眾館」、「美食博覽尊貴美食區」及其他博覽）：$40/張
購票詳情：按此
網頁：按此
文：Kar
隨時接收最新資訊
讚好OpenRice專頁！