公眾館
日本岡山晴王提子、日本山梨縣水蜜桃
雖然今年無得試食，但依然有唔少攤檔售賣日韓當季水果，例如呢間就有齊岡山晴王提子同山梨縣水蜜桃。前者粒粒飽滿、甜度高又夠爽脆，後者香氣濃郁、清甜多汁。
攤位：新天地美食（1E-A28）
韓國直送水蜜桃
日本水蜜桃受歡迎之餘，近年都多咗人留意到其實韓國水蜜桃都唔錯。呢檔就有齊韓國唔同地區直送嘅水蜜桃，有白桃、黃桃任揀，例如韓國長宜城水蜜桃就係出名香甜多汁嘅白桃！
攤位：仕必達有限公司（3D-B12）
鳳凰卷曲奇
人氣手工曲奇店曲奇阿嬸就新出鳳凰卷口味，其他熱賣口味仲包括雙重朱古力海鹽、花生朱古力、宇治抹茶白朱古力等等。可以單買一件，又或者買會場限定嘅Cookie Set，一次過試勻8款推介口味！
攤位：Cookieism Limited（1D-D23）
蛋卷工房手工蛋卷
香港品牌推出嘅手工蜂巢蛋卷，標榜以特濃全蛋配方、100%人手製作，金黃香脆而且層次豐富。有特濃鮮雞蛋、港式奶茶、日式宇治抹茶，同特濃朱古力共四款口味。最重要係會場先有得買一送一呀！
攤位：南怡國際集團有限公司（1D-A17）
抹茶·焙茶手工蛋卷、抹茶扭扭酥條、抹茶/焙茶手工戚風蛋糕
北川半兵衛商店今年就同本地唔同嘅手工食品品牌合作，包括同手工蛋卷品牌爸爸逸悠聯乘嘅抹茶·焙茶手工蛋卷，主打蝴蝶酥嘅Pretty Palmiers推出抹茶扭扭酥條，同元朗戚風蛋糕專門店老陳餅店合作嘅抹茶手工戚風蛋糕同焙茶手工戚風蛋糕，各位抹茶控必試！
攤位：匯泉國際有限公司（1D-B10）
北苑宇治抹茶、夢華冷泡香檳茶
源自澳門嘅茶室汴京茶寮亦帶咗佢哋嘅抹茶同冷泡茶嚟，北苑宇治抹茶係茶道級抹茶，味道甘甜醇厚。而夢華冷泡香檳茶其實係冷泡京都宇治嘅高級焙茶再打入氣泡，所以雖然無酒精成分，但有好似香檳咁嘅氣泡口感，加上濃郁茶香，一試難忘。
攤位：汴京有限公司（3D-A08A）
急凍雞蛋仔
喺屋企都可以食到外脆內軟嘅雞蛋仔！皆因呢個品牌推出世界首創嘅急凍雞蛋仔，用焗爐或者氣炸鍋就整到。最近仲同細味公平合作推出咖啡口味嘅雞蛋仔呀！另外仲有綠茶、黑白芝麻、花生醬、黑糖珍珠等創意口味。
攤位：坤記竹昇麵有限公司（1C-A14）
芫荽鯪魚餅、芫荽鯪魚丸、芫荽魚肉卷、芫荽牛丸、芫荽豬肉丸
芫荽控注意！呢檔推出推出芫荽五寶，100%香港製造，方便各位無荽不歡嘅朋友仔大手入貨儲糧。想食都好方便，例如芫荽魚肉卷、芫荽鯪魚丸同芫荽鯪魚餅都可以用氣炸鍋以氣炸方式加熱。
攤位：東方產品供應有限公司（1B-D28）
手工和牛芫荽燒賣、和牛芫荽餃子
大埔振興嘅牛丸出色之餘，其實佢哋仲有和牛系列同點心系列，各位芫荽控必試嘅自然係手工和牛芫荽燒賣同和牛芫荽餃子，同樣100%香港製造，標榜和牛同芫荽以黃金比例混合，食到兩款食材原味又夾到。
攤位：大埔振興有限公司（1B-D05）
智利原隻皇帝蟹
而鍾意食海鮮嘅朋友，嚟到美食博覽亦有一系列急凍同新鮮海鮮選擇，開飯仔就留意到唔少人都嚟呢檔揀皇帝蟹！皇帝蟹體積大而且夠厚肉，仲有分特大（1.4-1.6kg/隻）、特特大（1.6-1.8kg/隻）同超特大（1.8-2.0kg/隻）選擇啊！
攤位：日鮮食品公司（1B-D07）
伏特加金華火腿鹹蛋醬、紫菜味噌鹹蛋醬
網店鹹蛋妹妹主打即食鹹蛋、流心皮蛋同各款鹹蛋醬。伏特加金華火腿鹹蛋醬加入金華火腿增添鹹香層次，而紫菜味噌鹹蛋醬就偏日式口味，無論係用嚟搽多士、炒菜都咁啱。
攤位：建生貿易(亞洲)有限公司（3D-B42）
日照、夜霧、紅提蜂蜜酒、青提蜂蜜酒
日照．夜霧係由兩位九十後女生初創嘅本地手工啤酒品牌，品牌同名嘅兩款手工啤酒係帶熱帶水果香嘅日照NEPA，同雲呢拿朱古力風味嘅夜霧Porter，前者建議配燒肉或者Pizza，後者甜甜哋當然要配甜品！而紅提蜂蜜酒同青提蜂蜜酒都係用咗香港本地蜂蜜發酵，甜味自然好啱夏天飲。
攤位：黑酢家（1D-B27）
仮面ライダ50周年限量版套裝
Fans必買！呢個50周年限量版套裝全球只限1000套，每套都有獨立號碼識別，收藏度高。一套有三支酒，有係山田錦純米吟釀同朝日純米大吟釀，仲有兩個清酒杯同枡，即係裝清酒杯嘅木盒呀。
攤位：偉成辦館有限公司（3D-A11）
尊貴美食區
仙椰子薑汁
美食博覽率先推出嘅仙椰子薑汁，喺自家椰漿當中加入薑汁，椰子香氣濃郁之餘亦帶薑嘅辛辣香氣，口感柔滑。
攤位：甄沾記香港有限公司（3C-C11）
純素香蔥芝士鬆餅、純素雜莓鬆餅、自家製酸種貝果
鍾意食酸種麵包嘅朋友應該未食過都有聽過Alive Food嘅名，除咗最出名嘅酸種麵包同純素忌廉芝士，仲有深水埗店都未有嘅純素鬆餅同酸種貝果率先發售！前者有香蔥芝士同雜莓兩款口味，後者同酸種麵包一樣用自家酸種發酵而成。
攤位：Alive Food Limited（3C-E08）
三一餃子
中環嘅三一餃子就主打自家嘅盒裝急凍餃子，有蒜芯豬肉、薑蔥豬肉、粟米豬肉、芫荽豬肉、黑白松露、韭菜蝦皮共六款口味。包裝後面有埋詳細介紹教大家喺屋企點用平底易潔鑊煎靚餃，下廚新手們都唔使驚。
攤位：瓣瓣掂有限公司（3C-D02）
本地手工啤酒
唔少本地手工啤酒品牌都各有特色，呢檔就有15款畀大家慢慢揀，包括上個攻略有介紹過嘅檸樂味手工啤。仲有甜甜地啱入門嘅單眼佬話梅蜂蜜酒、加咗阿里山金萱烏龍嘅金萱烏龍柑桔黃金愛爾等等。
攤位：宏展(香港)投資有限公司（3C-D12）
咖啡果皮汽泡茶、冷泡咖啡
咖啡迷就自然要去五大主題區當中嘅「咖啡。醇香」專區啦，呢檔就有獨家發售嘅咖啡果皮汽泡茶同冷泡咖啡。咖啡豆係果實裡面嘅種子，而種子外面嘅果皮果肉就係咖啡果皮（Cascara），味道酸酸甜甜有啲似山楂，而且咖啡因含量比咖啡低得多。
攤位：Hong Kong Coffee Slave Company Limited（3C-F24）
紙咖啡、冷萃咖啡
沖咖啡都可以好簡單！紅磡咖啡店鳥山。商號就新出呢款紙咖啡，可以加室溫水再擺雪櫃做冷萃咖啡，亦可以加熱水沖泡成熱萃咖啡，又或者將室溫水換成牛奶就可以沖泡出冷萃拿鐵！而且大包裝方便同屋企人或者朋友開心Share呀。
攤位：厚啉 咖勹一（3C-F22）
第31屆美食博覽
日期：2021年8月12至16日
地址：香港島灣仔博覽道1號香港會議展覽中心
購票指南及其他詳情：https://bit.ly/3C64z30
博覽衞生措施：https://bit.ly/2WSgiSN
文、相：Cathy.H