大年初二想搵個靚位睇煙花？唔洗拎望遠鏡，唔洗霸頭位，我哋可以搵間餐廳坐低舒舒服服咁睇。大家都知維港兩岸睇最正㗎啦，所以今次同大家精選咗幾間大部分喺尖沙咀嘅餐廳，等大家享受美食之餘又可以食埋個煙花靚景。不過唔少都一位難求，大家記得要book定位啦！
 

高格調中菜　胡同

餐廳喺尖沙咀，坐落28樓高處而且對正維港，仲有落地大玻璃窗，真係睇得清楚得嚟又唔洗同人逼。年初二晚會提供11道賀年菜式，例如有「老乾媽酸菜燴龍蝦」。餐廳本身主打京川菜式，裝修氣氛仲模仿北京老胡同，同長輩食飯就啱哂！

供應日期：2019年2月6日
價錢：每位$1,688
 

精緻意日菜　Aqua

唔想新年期間晚晚食中餐？可以揀呢間一樣有一望無際維港全景嘅呢間餐廳。年初二會提供五道菜煙花晚宴，以意日菜式為主，當中仲有一直備受食客歡迎嘅「西京燒銀鱈魚配慢煮三陸鮑魚及香脆軟殼蟹」。咁就可以可以抖返吓，唔洗餐餐都食冬菇炆蠔豉！

供應日期：2019年2月6日
價錢：每位$1,588
 

「蝦蝦笑」拉麵　一幻拉麵

如果Fine dining或者排排坐食中餐兩樣都唔想揀，唔知食日式拉麵過年你又試過未呢？呢間日本過江龍拉麵嘅尖沙咀店今年特別推出「蝦蝦笑」煙花拉麵套餐，第一次食嘅話梗係揀招牌蝦湯拉麵啦。套餐仲包埋盒裝蝦湯拉麵，今次真係又食又拎。

供應日期及時間：2019年2月6日19:30
價錢：每位$388（另加一服務費）
 

賀年自助晚餐　馬哥孛羅咖啡廳

唔洗左諗右諗，就邊個食乜，啊邊個又唔食乜嘅best choice一定係自助餐。呢到除咗大路嘅海鮮，包括即叫即開嘅時令生蠔、龍蝦、松葉腳蟹等等之外，仲有特色賀年菜畀你揀，等你食自助餐個陣都不忘新年嘅氣氛。例如有「撈起」、「發財好市」、賀年糕點、 鮑魚、龍蝦、鴨掌等。

供應日期及時間：2019年2月6日18:00 – 22:30
價錢：成人每位$648、小童每位$388（另加一服務費）
 

特色澳洲菜　Wooloomooloo Prime

呢間餐廳除咗景觀開揚，仲有露台位置畀你chill吓！餐廳主打澳洲菜同扒類等西餐。而煙花夜宴套餐包五道菜式，由頭盤到甜品都有。主菜有「橄欖油水煮魴魚配Gremolata醬汁」，或「香烤澳洲和牛牛柳」，食肉獸肯定夠滿足！

供應日期：2019年2月6日
價錢：每位$1,288元（另加一服務費）
 

型格中菜　天外天

中菜唔一定老土！呢間型格中菜廳天外天，裝修簡約時尚。煙花匯演當晚會供應六道菜式晚餐，餐廳行政總廚準備咗唔少精緻菜式，好似皇湯蛋白香煎龍蝦、松露鵝肝鮮菌卷、金腿百合燉花膠等菜式，包你有新鮮感。

供應日期：2019年2月6日
價錢：每位$1,688（另加一服務費）
 

懷舊裝修新派粵菜　紅糖

位處紅磡碼頭附近，裝修充滿港式情懷，餐廳內嘅紅磚牆就好似舊日船塢倉庫咁，當然唔少得落地玻璃窗畀你飽覽維港景色啦！年初二有新春賀年煙花套餐，仲有唔少賀年菜式都好有意頭，好似「哈蝦大笑」即係茄汁煎大蝦，祝大家笑口常開。最適合成家人一齊去食。

供應日期：2019年2月6日
價錢：每位$1,088（另加一服務費）

文：Yanny