下星期就新年喇，當然要食糕點應節～想搞搞新意思，不如試吓自己整喇！今次一連兩星期搵嚟本地品牌莫忘煮食創辦人Antony教大家整簡易版嘅新年糕點，自家製糕點相比坊間買嘅又健康啲，今個星期先睇如何製作男女老幼都鍾意嘅蘿蔔糕！

材料:

粘米粉130g
澄面40g
雞湯300g
白蘿蔔1斤半
臘腸一條
蝦米 適量
乾瑤柱4粒
紅蔥頭1粒
白芝麻 適量
鹽及糖 適量

詳細步驟:

1) 蘿蔔去皮，然後刨絲，再切少量蘿蔔成條狀。

（小貼士: 去皮時刨深入少許蘿蔔會更清甜）

（小貼士: 分別刨絲及切條狀會令口感更豐富）

2) 切紅蔥頭蓉爆香，倒入蘿蔔絲及蘿蔔條，加入一茶匙海鹽及一茶匙糖。將浸發瑤柱的水和蝦米水倒入，一同慢煮至蘿蔔變淋。

3) 切臘腸粒和蝦米粒，瑤柱撕成一條條，備用。

（小貼士: 不炒臘腸會減低蘿蔔糕油膩感）

4) 將粘米粉及澄面拌勻，加入雞湯攪成麵漿，將已煮淋的蘿蔔連水一起倒入麵漿內。

5) 加入三分之二的臘腸粒、蝦米粒及瑤柱絲於麵漿內拌勻。

6) 把麵漿倒入膠盤，將另外三分之一 的臘腸等材料鋪在蘿蔔糕上，蒸45分鐘。

7) 出蒸籠後，灑上已炒過的白芝麻即成。

本地品牌莫忘煮食的創辦人Antony自小受到婆婆的啟蒙，喜歡上烹飪，更忘不了婆婆做菜的味道。正因為每一份味道都充滿著愛，Antony希望透過創辦「莫忘 ‧ 煮食」和大家分享感受到的溫暖，所烹調的美食亦能成為大家珍愛的味道。

食譜供應: 莫忘煮食創辦人Antony

文: Yanica

相、片: Tom Li