常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。
以為搵食一定要出市中心？荃葵青區近年愈來愈多新餐廳甚至過江龍進駐，可以話係搵食地區嘅後起之秀，而家反而愈來愈多人特登走入荃葵青區搵好嘢食添！今年優秀開飯熱店大賞荃葵青區入圍十強有本土港式茶餐廳，有養生台式火鍋，又有日本嘢韓國嘢，連創意中式點心同打卡Café都有，種類咁多元化，難怪呢區咁快崛起啦！
意大利菜小店 Cossi
區內人氣高企嘅西餐小店，環境舒適寫意坐得又舒服，而且食物水準高之餘價錢仲好實惠，係唔少荃葵青友聚餐之選。必試之選有炭燒美國牛肩扒，牛肉味濃得嚟有陣陣炭火香，肉質軟唸。龍蝦湯入口鮮味，湯內有蝦肉，絕無欺場。蕃薯條炸到好香口，叫一碟同朋友share就啱啦！
來自九州的日式café L.D.K. by Ufufu Café
嚟自九州嘅日式cafe品牌，裝修風格係和室簡約風，葵芳分店仲特設西日式洋食菜單。餐廳以超多款芭菲而聞名，宇治抹茶蕨餅芭菲茶味香濃，係人氣之選。主食方面，蛋包飯蛋層厚薄適中，半熟嘅蛋皮下係炒飯底，又幾有驚喜。另外仲有烏冬、鐵板燒同和風意粉㗎。
韓式火鍋自助餐 樸生
喺香港地想搵任食火鍋話都無咁易，但韓式自助火鍋又真係少見啲。青衣呢間韓式自助火鍋選擇夠哂多，除咗火鍋基本嘅肉同菜任叫外，自助區都大把選擇，有部隊鍋區、石頭飯區同甜品區，全部都可以自製㗎～又幾好玩喎，另外仲有得任食炸雞，二百蚊嚟講真係好抵食！
天鵝主題café 咖啡灣
呢間café就啱哂女士們嚟！餐廳以天鵝為主題，周圍都係天鵝嘅擺設，仲有咖啡杯造型嘅坐椅，真係唔影返一輯寫真都唔駛走。餐點方面主打畫上唔同卡通人物同拉花嘅咖啡，另外佢嘅窩夫造型同味道都絕對滿足到食客視覺同味覺，食完真係少女心爆發啊！
圖:Susansyleung、happylucky ning
摩登點心中菜館 唐宮小聚
飲茶再唔係老一輩嘅專利啦～呢間中菜館主打各式摩登點心，所有點心造型都好精緻，味道都好出色添！如黑金流沙奶皇包外型就好trendy，紫蓉豬豬紫薯蓉包又好可愛，你話點捨得食佢呢？仲有珍珠蝦餃、紅粉佳人、蟹粉麻球等都值得一試，飲茶原來都可以相機食先㗎。
荃葵青區十強仲包括老牌茶餐廳嘉樂冰廳、文青風咖啡館荳子、巨無霸刺身丼爆丼丼、舊港式西餐風雅高·33同埋大熱嘅養心殿台式養生鍋，邊一間係你嘅心水？即刻去投票更有機會獲得豐富獎品：
https://www.openrice.com/info/awards2019/index.html
文: Yanica