【開飯熱店入圍名單巡禮】飯局熱點旺角一地藏十虎

美食當前，相機食先。作為foodie，先影為敬再放上IG直情係反射動作！優秀開飯熱店2018以「美食大晒　盡情Show Quali」主題，無論你係食家定係大廚，有好嘢自然要晒一晒！即刻睇睇各區同各類型必試熱店如何大晒功架！

作為大多數人約#飯局嘅地點，#旺角呢個旺區食巿林立😎，由酒店級餐廳到小食店、由自助餐到快餐，當然係乜選擇都有，正所謂平有平食，貴有貴食，最緊要好食嘛👍👍👍！今年入圍#優秀開飯熱店大賞嘅呢十間餐廳，有冇邊間係你哋嘅#心水飯堂先😚？睇完記住去#投票呀！

主題自助餐 The Place

酒店嘅自助餐餐廳，梗係多嘢食啦。佢哋會按季節時令，耐唔耐就轉下唔同嘅buffet主題，好似早前就係日韓秋祭，而最近就係中國名菜。不過，無論咩主題都好，新鮮即開嘅生蠔，同一大堆鮮甜嘅海鮮冷盤、甜品係永遠都唔少得！

人多嚟食呢間就最啱喇，沙律、串燒、炒粉麵飯等等全部都可以開心些牙，食多幾款。尤其是係咖喱軟殼蟹，咖喱香濃但唔太辣，送飯一流。而呢間餐廳最廣為人樂道嘅就係只要消費夠指定嘅金額，就可以用$1嚟叫多樣嘢食，抵呀！

蛋包飯就食得多，蛋包金邊粉？呢間泰國菜餐廳用蛋網包住啲金邊粉，靚得嚟亦有蛋香。其餘嘅生蝦呀海南雞飯呀冬蔭公呀等等嘅菜式，都好有泰國嘅風味，酸酸辣辣，唔怪得餐廳成日都好多人等位啦。

舖頭個名已經話晒你聽嚟到要食乜，就係吉列牛同忌廉烏冬喇！自己牛肉自己燒，點醬加wasabi食零舍香口。忌廉烏冬本身都已經吸引，仲要加埋咖喱，有奶香得嚟又辣辣地，掂！同埋可以放心，啲cream係light嘅，唔怕膩呀。

打邊爐都唔一定熱氣嘅，養生都ok，睇下你食咩湯底嘅啫。呢間火鍋店就有啲好受女士歡迎嘅養生湯底揀喇，有多藥材熬製，又有人參雞等，記得飲咗轉湯先好開始淥嘢食呀！另外，火鍋料當然唔少得台式嘅凍豆腐呀鴨血呀同和牛等等啦。

其餘入圍嘅仲有Cafe Paradise、Sky726、Running 燒、米走雞、i CREMERiA Café，揀啱心水就即刻去優秀開飯熱店大賞網站投票啦，有機會贏到豐富獎品呀！

文：Kar