【飲食潮流】点心代表 x Little Twin Stars粉緻點心

之前Pantone就宣佈咗2016年嘅代表色係玫瑰石英粉同寧靜粉藍兩隻色，粉紅色加粉藍色...咪即係Little Twin Stars？所以話2016年亦係Little Twin Stars年(好似係)，而点心代表亦搶先同12月嘅壽星Little Twin Stars Crossover，喺中環新店同尖沙咀總店推出一系列粉緻點心！

望望餐牌，呢個系列總共有十款餐點同七款甜品，選擇都唔少，而且從中式嘅蝦餃燒賣，到西式嘅漢堡沙律都有。每款都加上Kiki同Lala嘅大頭或者代表色，有心思得嚟又可愛。

點心方面必試奶皇流沙包，裡面嘅奶皇餡流心程度甚高，食嘅時候記得小心啲。奶皇餡帶奶黃香味之餘仲有少少麥香，因為奶皇餡加咗好立克。雖然包身厚咗少少而且唔夠鬆軟，但有蛋黃粒又非常香嘅流心餡同Kiki同Lala嘅大頭足夠挽回分數。

蝦餃有兩款，彩色蝦餃以Little Twin Stars嘅代表色為主，簡單得嚟亦為平時白色單調嘅蝦餃增添吸引力，另外亦有印上大頭嘅水晶白蝦餃。兩款蝦餃都皮薄唔黏牙，蝦肉餡亦相當彈牙。雖然加咗顏色同大頭，但兩款蝦餃嘅皮入口味道都同普通蝦餃皮差唔多，相機先食之餘亦滿足口福。

西式點心方面以星星青芥一口堡最吸睛，漢堡包用咗Little Twin Stars代表色，仲將漢堡包同芝士都整成星星型！漢堡分量都唔細，女仔真係想一口食嘅話可能要先稍微壓扁一下個包，麵包偏亁身煙韌，下面嘅芥茉醬帶辣，半煎炸嘅蝦餅香脆彈牙，飽肚又惹味。

另外仲有海鮮凱撒沙律同海鮮五榖炒飯，前者有印咗Kiki Lala大頭嘅帶子，後者就印喺海班塊上面。沙律健康怡人，而五榖炒飯就用咗台灣進口嘅紅米、香米、糙米、粟米同胡蘿蔔，連同海鮮炒至乾身，加埋柚子汁，一樣健怡清新。兩款都加咗Kiki同Lala嘅旗仔，可愛加分。

甜品方面燉奶椰皇就CP值最高，原隻椰皇奉上，帶椰子清香嘅牛奶燉蛋白又滋補。另外亦食正芝士撻熱潮，推出白朱古力芝士撻。不過注意嘅係呢款芝士撻並唔係半熟果款，所以唔會有流心嘅效果，但半溶芝士加酥化嘅牛油撻皮依然唔錯。上面有一塊印咗Kiki或者Lala嘅白朱古力，白朱古力嘅甜同芝士嘅鹹意想唔到地又幾夾。

細食啲嘅話，甜品可以揀精緻嘅Cup Cake，有Kiki同Lala兩款，其實都係上面裝飾嘅分別。整體大部分餐點同甜品都見到Kiki同Lala，而且連花茶亦用上限定Little Twin Star嘅餐具，夠細心。雖然話整色整水就唔少得用到色素，同印住Kiki同Lala嘅米紙，不過大部分Kiki同Lala嘅樣都完好，影相位的確唔少，粉絲們要潮聖嘅話相機同手機都記得叉夠電。

隨時接收最新資訊
讚好OpenRice專頁！