想喺香港食到日本街頭風味嘅小食？只要你識得捐窿捐罅，周圍發掘一下，想喺香港食返似樣啲嘅車輪餅、玉子燒、手卷同章魚燒，其實唔難！今次等開飯仔帶大家展開香港版嘅日本街頭小食掃街之旅啦。

（圖：ohmyfoodiary）

唔知點解好多食家每次見到任何流心嘅食物都會無晒抵抗力，即刻令銀包。呢間又會唔會令你咁做呢？車輪餅即係日本嘅今川燒，呢間車輪餅小姐主打嘅流心日本宇治抹茶同流心伯爵奶茶口味車輪餅同樣超吸引眼球，10蚊一個由店主即叫即整。新鮮出爐嘅車輪餅由鬆軟外皮包住嘅熱騰騰嘅流心餡料，一咬落去，係幸福嘅感覺啊！除咗以上兩種口味，店主經常會研發新口味，每日亦會推出唔同口味嘅車輪餅，當中oreo阿華田麻糬同高纖紫薯亦好受歡迎。但因為大部分車輪餅都係即叫即整，難免要等一段時間，大家想試嘅話一定要記住耐心等待啊！

（圖：au9）

相信去過日本築地嘅人都一定會對嗰度即叫即整嘅玉子燒念念不忘。唔洗心掛掛啦，去荃灣都可以搵到即叫即整嘅玉子燒專門店喇！煙燻玉子燒有別於傳統，採用創新煙燻方法製作玉子燒，香甜嘅蛋配上各種口味如紫菜明太子、櫻花蝦、紫薯、黑糖等。一打開蓋就聞到濃烈嘅煙燻味，玉子外實內軟，軟綿綿嘅口感再配上清甜日本蘿蔔茸，兩者配合得恰到好處，玉子愛好者必試！

（圖：jx_t01、Miss 食）

寒冬下買一份熱辣辣嘅章魚燒保暖，相信係每一個人去日本嘅指定動作。而築地GINDACO就係一間日本著名嘅章魚燒連鎖店，沿用日本傳統方法製作章魚燒，令你食完有置身日本街頭嘅感覺。章魚燒燒到外脆內軟，食落口有少少煙韌，加上大量紫菜、木魚絲、蛋黃醬同燒汁，令人忍唔住食完一粒再接一粒。唔少人都認為築地GINDACO係全香港最好食嘅章魚燒，佢地曾經喺香港有幾間分店，可惜依家得返太古分店仍然營業，大家想食就要襯早去喇。

 

（圖：qtqueenie）

近一兩年香港興起咗一鼓手卷熱潮，手卷小食店開到通街都係，要突圍而出，的確唔容易。卷王就係其中一間比較有特色嘅手卷小食店，有幾十款唔同嘅單拼、雙拼同三拼手卷，選擇多到令開飯仔都覺得有選擇困難症。特別推介嘅係呢度嘅海膽手卷，可以揀原板同半板嘅海膽，份量超多，雖然價錢唔算好平，但質量同價錢都算係成正比。佢地細心地提供咗唔同辣度嘅豉油，再用鋁紙包住紫菜底部，令豉油唔會流到成手都係，呢個位值得加分。

（圖：Voracious）

雖然J'aime Pain唔係專賣日本麵包，但小店入面其中一款冬甩同日本嘅麻糬炸包好相似，質素亦唔錯。呢款紫薯Q心冬甩外層鋪上紫薯粉，入面包住滿滿紫薯蓉同麻糬，令整個冬甩嘅口感豐富，有彈性，睇得出係用心之作。店內嘅其他麵包亦非常有特色如芝士紅豆包同粟米包，唔少都係其他地方唔容易見到嘅口味。

（圖：Shad.T0）

相信各位住荃灣嘅朋友對東京站一定唔會陌生，因為呢到賣嘅小食出晒名係平靚正，絕對係放工放學搭車經過嘅醫肚之選。呢到嘅叮噹餅類似上面提過嘅車輪餅，價錢超抵，只係賣$6一個，$20四個。東京站嘅叮噹餅有多款口味，豆沙、奶黃、抹茶等等，雖然平，但叮噹餅都做到鬆軟質感，餡料亦新鮮夠熱，一個字，抵！呢到仲有雞蛋仔、格仔餅、章魚燒、Q餅等多款小食，大家下次經過記得去試吓喇。