今次係用磨到粉狀嘅杏仁調配杏仁漿而成嘅杏仁奶凍雪糕，開飯仔已經率先試食咗，有好香口嘅甘香杏仁味，感覺都幾清新，幾有夏日氣息，而且唔算話好甜。鍾意杏仁甜品嘅朋友仔應該會幾開心，終於唔會再淨係得喺其他口味上面配搭住啲杏仁碎，而係有成杯真真正正杏仁味嘅雪糕！
杏仁雪糕本身嘅味清清地，好適合配埋其他甜品一齊食。喺門巿可以食埋杏仁味雪糕蛋糕，又或者係杏仁雪糕搭配芒果加奶凍，一樣都有清新嘅感覺。
而Hotel Icon亦都有一款叫Mesdemoiselles Profiteroles嘅甜品，融合咗呢隻最新嘅杏仁味雪糕同長期都喺大家飛佛榜嘅士多啤梨味雪糕，鬆軟嘅泡芙加埋堅‧士多啤梨、黑醋等等，整到靚一靚咁樣，又睇得又食得，不過呢，獨家㗎，全港得呢度有得食咋。
咁呢幾款又係咩嚟？哦，冇，話說法國甜品大師Jean-François Arnaud嚟咗香港示範整雪糕甜品啫，杏仁雪糕拎嚟整甜品又真係幾夾。而由於時間關係，開飯仔已經代大家食晒㗎喇，冇咩事我返出去繼續開工喇。
文：Kar
隨時接收最新資訊
讚好OpenRice專頁！