2019年，為香港人帶嚟咗好多新鮮嘅味道。嚟自世界各地嘅人氣餐廳都紛紛進駐香港呢個小小嘅地方，數下數下，有超過50間呀。每間過江龍餐廳開業時，都引起一陣排隊打卡、IG洗版嘅熱潮，以下咁多間餐廳，你哋又排過幾多間？
拉麵系 金色不如帰
呢間拉麵店連續兩年奪得《東京米芝蓮》嘅一星榮譽，喺日本成日大排長龍，最近終於抵港啦！自家熬製湯底，最特別係用新鮮大蜆熬製嘅秘製蜆湯，鹹香帶鮮，飲落更有層次。佢哋嘅招牌拉麵——貝汁醬油拉麵同貝汁鹽味拉麵，前者加入黑松露醬、牛肝菌粉等，而後者就加入咗秘製嘅白松露油，食落特別fresh～
其餘包括﹕鬼金棒、多賀野、緣屋札幌元袓蝦湯拉麵、麵屋武一、哲麵、THE TOMATOMAN
茶飲系 ChaTraMue
一間又一間嘅台灣茶飲店，難得有間飲泰國茶，令人耳目一新呀！佢哋嘅泰式奶茶選用返泰國茶葉，茶味特別香濃，甜中帶微澀，唔會得個甜字。仲有泰國奶茶雪糕、綠茶雪糕、奶茶飄雪等，微甜嘅味道，加上冰涼嘅口感，係爽嘅！
其餘包括﹕語菓、NUTTEA 、樂法、本茶、汴京茶寮、吃茶三千
火鍋系 美滋鍋 
香港人愛打邊爐，各地唔少品牌都進駐！呢間嚟自新加坡嘅火鍋店，就主打養顏藥膳鍋，好似膠原蛋白養顏美容鍋、養生藥膳醉雞鍋等～餐廳嘅裝修以夢幻粉紅為主題，充滿少女心嘅女生們就實去過朝聖啦！
麵包系 Tardemah
麵包就食得多啦，咁加入咗艾草、年糕、辣雞嘅方包食過未先？呢間嚟自韓國嘅有機麵包店，喺香港開設咗第一間海外分店啦，唔使再去韓國做排隊黨！麵包口感軟綿，成份天然，招牌嘅艾草年糕麵包，咬落去口感非常豐富，有年糕、紅豆、栗子等，稱得上係麵包控今年嘅小確幸呀～
其餘包括﹕Gontran Cherrier 、Élysée Bakery(已結業)
梳乎厘系 王子神谷
梳乎厘熱潮喺香港居高不下，傳說食一啖就馬上有幸福感。而呢間過江龍就嚟自台南，麵粉、牛奶、雞蛋等就取自日本，口感輕盈。仲推出8款香港限定，好似北海道夕張哈密瓜、70%Mix朱古力瀑布等，甜度不一，實有款啱你口味啦！
其餘包括﹕Micasadeco & Café
芋圓系 鮮芋仙
除咗台灣珍奶之外，台灣芋圓都係香港人最愛之一呀！呢間超人氣芋圓店，早喺深圳、美國等地開咗12間，今年終於進駐香港！煙韌嘅芋圓，配上仙草、豆花等唔同配料，大大碗好豐富！仲有香港限定嘅綠豆糕麻糬拼盤，口感一樣咁qq～
其餘包括﹕嚐仙
歐美人氣餐廳系 Tiffany Blue Box Café
迷倒萬千少女嘅Tiffany Blue，繼紐約之後，嚟咗香港開第二間分店，點都要去朝聖下打個卡啩！餐廳主色當然係Tiffany Blue啦，而碗碟、座位、食物都係Tiffany Blue呀！要邊食邊尖叫咯！想打卡嘅當然要嗌佢哋嘅下午茶，grand得嚟又帶啲少女心！
其餘包括﹕Fortnum & Mason、Duck & Waffle 、Red Lobster 、Gelato-go、Avobar
日本系 壽司郎
今年嘅日本過江龍真係數都數唔晒呀！又拉麵又梳乎厘，仲有壽司呀！呢間壽司過江龍閒閒地都要等返一個鐘左右！咪以為只係普通迴轉壽司呀，材料新鮮，價錢親民，十幾蚊就可以食到大吞拿魚腩壽司，仲設有香港限定壽司，包括生火腿卷、鰻魚卷、花之戀等，喺日本都食唔到呢！
其餘包括﹕頑固壽司、金子半之助、天吉屋、驚安之殿堂 、天下鳥、はち八(88) 、京都富小路やま岸、日山、TIRPSE 、京都一の傳、RAPL 、Afternoon Tea TEAROOM 、GARAKU Soup Curry
韓國多士總有種莫名嘅吸引力，一食就食唔停啦！而家喺香港都可以食到啦！呢間連鎖店喺韓國有130間，多士即叫即做，加上秘製醬汁，食落特別香！招牌韓式漢堡扒拉絲多士，漢堡扒由韓國直送，加埋勁多車打芝士，芝士控一定like！
其餘包括﹕
Isaac Toast、PERFECT‧ICE 、三進魚糕、Arirang Hotdog
台灣系 桔梗
香港人飛去台灣就係想chill、想有文青feel，呢間嚟自台北cafe就可以滿足晒你對台灣嘅憧憬啦！餐廳設計簡約，而且夠晒寬敞。主食上提供三文治、燉飯，好似「海底世界」嘅燉飯咁，滿滿嘅海鮮，幾個人share都ok啦！
其餘包括﹕Draft Land 、KIKI麵店、初茶 X 山雞部
另外仲有嚟自泰國嘅船皇、新加坡嘅Chatterbox Café同中國嘅我是酸奶君等等呀！唔知下年仲會有邊間過江龍進駐呢？可以同大家預個告，1月頭會有嚟自紐約嘅人氣甜品店Dominique Ansel Bakery呀！ 除咗經典法式甜酥麵包之外，仲會有香港限定創意甜品，包括「紙包檸檬茶 – 伯爵茶佛手柑蛋糕」及「菠蘿包 – 椰子熱情果蛋糕」等！
文﹕Kiko
編：Kar
