 | Simply Nutrition 營養師陳小艷（Sharon），香港大學食物及營養學畢業，並取得社區營養深造證書，曾於不同機構分享營養知識。fb專頁: nutritionsharing |
壞習慣1：鍾意著鬆身衫
著鬆身衫唔單只較難發現自己肥咗，心態上仲會變得鬆懈啲。其實，正視自己肥胖嘅問題，可以更積極咁督促自己執行瘦身計劃。試下買細一個碼數或較合身嘅衣服，定下喺「某某日期一定要著得落」嘅目標，並且以負重運動嚟雕塑線條，當你喺瘦身嘅過程中慢慢能著得落件衫時，真係會好感動㗎！
壞習慣2：食得太快
由食野到大腦發出「飽肚感」嘅訊息，最少需要20分鐘。如果你食得太快，大腦就嚟唔切發出飽肚訊息，令人喺不知不覺間食多咗。所以，培養「慢慢食」嘅習慣，係控制體重嘅重要一環。
壞習慣3：唔願郁
鍾意賴床、賴係沙發度睇電視，唔願郁、唔想郁、有得坐就坐，如果呢啲係你嘅寫照，咁呢啲都係你瘦唔到嘅主因。生活中其實有好多增加卡路里消耗嘅機會，例如改行樓梯、提早一站落車行返屋企、返工時多啲去pantry斟水以作來回走動、喺屋企邊睇電視邊踏stepper等等，唔好睇少呢一啲啲小改變，加起來能令你更接近瘦身目標！
壞習慣4：經常捱夜
捱夜時，由於離上一餐已經有一段時間，此時不免會有啲肚餓。 而好多人捱夜時會揀杯麵、糖水、薯片等高熱量嘅食物嚟充飢，想唔肥都難哦。所以，如非必要都唔好捱夜，早啲瞓、俾身體叉足電啦！若迫不得已要捱夜時，改食一啲比較健康低卡嘅食物如水果、低糖豆腐花或方包加少少果醬都係唔錯嘅選擇嚟㗎。
待續......
想keep住每日都知多一點點如何營養瘦身變靚啲？記得like我開設的fb專頁啦！
※上述內容純屬作者個人意見，不代表本網立場。※