對於火鍋控嚟講，lunch去打返個邊爐一啲都唔過份，烚下烚下咁就一個下晝~ 認真㗎，銅鑼灣新開咗間一人前日式涮涮鍋店，95%嘅食材都係由日本直送，包括A5、A4鹿兒島黑毛和牛、北海道「四元豚」同博多「華味鳥」地雞等，湯底仲有成12款選擇，pop up店開到4月咋。

湯底可以話係打邊爐嘅精髓嚟，12款湯底主要分為和風（鰹魚、柚子塩等）、洋風（牛肉、咖喱等）同中華風（白雞、藥膳等）三大類。一人一鍋，多幾個朋友一齊去食，就可以試到多幾款湯底啦～

lunchtime嘅「牛雞豚涮涮鍋定食」大約百零蚊左右，就可以一次過食到三種肉！其中豬肉係北海道四元豚嘅五花腩肉，肥瘦層次分明，脂肪帶有甜香。咖喱湯底係日本咖喱，混入蘋果等製作，香甜而不辣，好惹味。最後淥埋個烏冬，索埋啲湯底就更加滿足。

晚餐嘅選擇就有更多，博多華味鳥嘅地雞喺九州嗰邊嘅天然環境下飼養長大，肉質嫩滑彈牙，揀埋用上大量雞骨熬製嘅香濃白雞湯底，味道就更清甜。呢個set特別配埋柚子胡椒醬，輕輕點少少食，突然爆發嘅胡椒辣已經足夠刺激。

牛控唔使問，實揀牛的啦~ 有和牛肩肉或和牛西冷揀，仲有分A4定A5。牛肩肉再配埋牛肉清湯底真係不得了，湯底嘅味本身已經好濃香，牛肩肉仲要好多油花，分佈平均，肉味重，建議可加少少胡麻醬享用。

A4和牛西冷粉嫩色系，佈滿雪花，肉質軟腍香濃，配埋壽喜燒，沾滿蛋汁咁食，夠晒滿足。剩咗嘅蛋汁撈飯食都得。

餐廳位於銅鑼灣商廈高層，地方闊落樓底高之餘，仲望到大海景，係幾舒服嘅一個打邊爐地方。

しゃぶしゃぶ四季（Shabu Shabu Shiki）
地址：銅鑼灣登龍街18號V POINT 30樓
期間限定：即日起至4月

文、相、片：Kar