「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下將軍澳啦。
即包即煎餃子 良記
圖：阿打、TwinkleLai
唔止荃灣、太子有好食嘅餃子，將軍澳都有，仲要好抵食，22蚊有10隻，大食仔唔夠飽嘅叫多碗豬油渣麵囉。全部餃子都係即場包同煎嘅，到手嗰陣仲係熱辣辣。皮薄，餡多，雖然都係韮菜、蘿蔔等普通餡，冇乜花臣，但煎得幾香，記得要加埋甜豉油同辣椒油食。惟一不足係冇得堂食，同埋要排下隊等下咁。
生牛肉湯檬 湄南
圖：食越南嘢嘅呢間，一個人通常都係搵下粉麵食，咁咪食下越南麵囉。首推生牛肉湯濛，建議落埋青檸汁，清新啲開心啲，湯底幾甜。主角，即係啲生牛肉都夠香。唔食牛嘅有香茅豬柳湯濛粉揀，酥香肉滑。
去骨海南雞 OK德海南雞專門店
圖：睇個名就知呢間食海南雞飯，對自己好啲啦。呢度啲海南雞仲要去晒骨嘅添，啖啖肉，啲雞都算滑嘅。點甜豉油、泰式辣醬定薑蓉就睇個人口味啦。
自選車仔麵 匯麵一九五0
圖：呢間食車仔麵嘅，性質本身都幾啱一支公去食，特別係唔鍾意同人接觸嗰啲，因為呢度連落單都係對住部機自己篤篤篤就得。麵食種類都算多，車仔麵、公仔麵、喇沙等等都有得揀，而麻甩嘅選擇一定係車仔麵加辣汁，例牌豬皮魚蛋蘿蔔，索汁一流。溫提，淨係可以用八達通畀錢㗎咋。
魚湯飯 湯飯店
圖：通常自己一個人食飯嘅選擇，都係以平、快作標準，呢間茶記加多個正畀你。嚟到一定係食湯飯，魚湯底，夠甜，兩餸一菜，好似揀車仔麵咁揀。魚頭、魚骨、魚腩、魚片任君選擇，又或者要份牛雜都ok，牛肚炆得夠入味呀。
文：Kar
