「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下沙田啦。
冬蔭公米線 金潮泰
圖：呢間泰國菜店，位於愉翠苑街市入面，又係嗰啲細細間舖唔會坐得太舒服嗰類，但係幾抵食，一個人食幾啱。主要係食米線嘅，湯米定撈米都有，稍為食得辣嘅一定係揀冬蔭公湯底，酸酸辣辣好開胃。再叫多份酸辣鳳爪就perfect池，自己一個喺度吮腳指，幾冇儀態都唔使怕畀朋友睇到，可以盡情享受。
香噴噴串燒 新蒲坊
圖：Pinkpump
有啲朋友，得自己一個食嗰陣，就唔喜歡坐低喺餐廳入面食。咁呢間串燒店就啱晒，行過附近就已經好容易畀佢嘅串燒味吸引咗。都幾多選擇，豬牛雞、司華力腸之類都有，全部即叫即燒，火侯控制得幾好，食之前記得，記得，記得要搽咗蜜糖同沙嗲醬先，精髓嚟。
蕃茄蛋菠蘿包 劉萬利咖啡粉麵燒臘飯
圖：感覺有些少麻甩，亦係好多沙田街坊由細食到大嘅飯堂。雲吞麵、炸醬麵廿零三十蚊就有交易，麵條未至於好彈牙但係都好爽口，雲吞足料，炸醬亦夠香口。又或者可以揀食蕃茄蛋菠蘿包，隻蛋係流心蛋嚟，一咬開就會有蛋汁流出嚟，可能食得會有些少狼狽，但自己食，冇緊啦。
【一個人開飯】系列： |
平價全日早餐 La Kaffa
圖：呢間café，對比起連鎖集團嘅快餐店，款式較多而且性價比較高。自己食又想食好啲嘅，叫個全日早餐一啲都唔過份，有流心egg benedict、英式鬆餅等等，都幾豐富呀。又或者想食light少少嘅，烤雞沙律吖。有菜又有肉，夠健康，雞肉都嫩滑。
必然之選 宜家家居餐廳及咖啡室
圖：數到沙田區嘅一人飯堂，冇可能冇宜家份。由食極都唔會厭嘅瑞典肉丸，到脆口薯格，到高級享受嘅芝士焗龍蝦、咸豬手都有。雖然唔會話好大隻，但平平地夠過下口癮嘛。豬手嘅皮炸得仲好脆添。
文：Kar