復活節又就嚟到啦，大家諗好去邊玩未先？有小朋友嘅可能會比較頭痛，事關學校長假期冇理由淨係同小朋友留喺屋企㗎嘛。不過唔使擔心，開飯仔幫大家精選咗六大復活節自助餐，全部都有得食有得玩，即刻睇下邊間最啱你心水啦！
戶外城堡彈床 Promenade西餐廳
呢間餐廳啱哂好動嘅小朋友，餐廳特別設有戶外城堡彈床，等小朋友可以盡情玩餐飽。其他活動仲包括冬甩製作班、尋找復活節金蛋活動、魔術表演同扭汽球表演等，小朋友嚟到一定好開心。而嘢食就唔少得賣相可愛嘅甜品，好似復活兔棉花糖、合桃甘筍蛋糕同迷你甜甜圈等，夠哂應節。
供應日期：4月1至2日
價錢：
午餐（上午11:30 至 下午2:30）成人$468/位；$528可享免費無限添飲氣泡酒，紅酒或白酒，以及果汁及不含酒精飲品，3-11歲小童$328/位；下午茶（下午3:30 至 5:30）成人$328/位，3-11歲小童$208/位；
晚餐（晚上6:30 至 10:00）成人$628/位，3-11歲小童$418/位
*凡於酒店eShop訂購西餐廳復活節自助午餐可享85折優惠、下午茶自助餐及自助晚餐可享8折優惠
*「復活節冬甩製作班」名額有限，只限eShop預訂復活節早午餐及下午茶自助餐之客人及只限3至11歲之小童免費參與。
朱古力兒童工作坊 咖啡亭
想瞓晏啲嘅下午茶自助餐都係一個唔錯嘅選擇。呢間餐廳嘅甜品賣相都好吸引，好似有大蛋包細蛋嘅朱古力復活蛋同馬卡龍塔，影相打卡一流。而下午茶自助餐時段仲就特別提供朱古力兒童工作坊，等小朋友可以自己製作獨一無二嘅朱古力。大人就可以放心坐定定嘆美食。不過提提大家工作坊名額每日得十個㗎咋，想試嘅記住要早啲預約！
繽「Fun」復活節自助餐
供應日期：3月30日至4月2日
價錢：
午餐（下午12:00 至 2:30）成人$368/位，3-11歲小童及65歲或以上長者$298/位；下午茶（下午3:00 至 5:00）成人$308/位，3-11歲小童及65歲或以上長者$258/位；
晚餐全時段（晚上6:00 至 11:00）成人$708/位，3-11歲小童及65歲或以上長者$548/位；首輪（晚上6:00 至 8:00）成人$648/位，3-11歲小童及65歲或以上長者$508/位；次輪（晚上8:30 至 11:00）成人$648/位，3-11歲小童及65歲或以上長者$508/位
*隆堡鑽石卡及Rhombus Dining餐飲應用程式會員可享7折優惠，詳情請向餐廳查詢。
小童免費 帝苑廳
呢間餐廳嘅復活節自助午餐就以小童免費為賣點，只要每兩位成人惠顧，一位小朋友就可以免費享用啦，夠哂抵食。小朋友仲可以免費參加蝴蝶酥製作班，親手學整酒店餅店馳名嘅蝴蝶酥。仲可以同小丑學扭汽球同復活兔影相添。而菜式就有海鮮冷盤、鮮蝦雜果沙律、燒全羊同芒果雲吞等，大人小朋友都啱食。
復活節自助午餐
供應日期：3月30日至4月2日
供應時間：中午12時至下午3時正
價錢：成人$368/位，3-11歲小童$188/位
*兩位成人惠顧，一位小童免費 (每天只限30名)
半自助早午餐 貝爾特酒廊
住屯門附近嘅朋友如果唔想去咁遠嘅話，不如試下呢間酒店新出嘅半自助早午餐丫。前菜有多款冰鎮海鮮、沙律同點心等。而主菜就可以喺西班牙蒜香蝦意大利飯、煎牛仔骨配薯角及橙酒燒汁、松露醬班尼迪蛋配露筍及雜菌或焗芝士茄子卷配蕃茄醬呢四款入面揀一樣。餐廳仲提供復活節彩蛋繪畫同兔形曲奇裝飾設計畀小朋友玩添。
復活節特式半自助早午餐
供應日期：3月31日至4月2日
價錢：成人$298/位，小童$238/位
*於3月18日前預訂可享早鳥優惠：成人$208/位，小童$168/位
免費製作草莓拿破崙餅 City Cafe
平時太忙冇時間陪小朋友玩？呢間餐廳嘅復活節自助午餐就提供免費草莓拿破崙製作班，仲提供即影即有相片，等你哋可以記錄低一家人美好嘅時光。其他嘢食仲有日式刺身及壽司、即切燒美國西冷牛排、沖繩岩鹽草莓芝士餅同即叫即製草莓味及抹茶味雞蛋仔等。
City Cafe復活節自助午餐
供應日期：3月30日至4月2日
供應時間：中午12時至下午3時正
價錢：成人$278/位，65歲或以上長者$258/位，4-11歲小童$208/位
*於官方網頁預訂及繳付訂金可享優惠價成人$238/位，65歲或以上長者$208/位，4-11歲小童$168/位及免費參與草莓拿破崙餅製作。詳情請到網站查詢。
自製甘筍木糠布甸盤栽 倚窗閣
呢間餐廳嘅小朋友復活節美食工作坊就夠哂多元化，除咗可以自己炮製三文治，仲可以裝飾甘筍木糠布甸盤栽同薄餅添。而大人就可以主攻即開生蠔、波士頓龍蝦、即叫即切牛扒、紅桑子朱古力復活蛋同Mövenpick雪糕等菜式。
“Peek-a- boo”復活節自助餐
供應日期：3月30日至4月2日
價錢：
午餐（下午12:00 至 2:30）成人$358/位，小童$278/位；
下午茶（下午3:00 至 5:00）成人$278/位，小童$198/位；
晚餐（晚上6:00 至 9:30）成人$578/位，小童$398/位；
*另設酒店網上商店優惠價，詳情請到網站查詢
文：Crystal