秋風起，唔單止代表可以將衣櫃裡面嘅秋冬衫拎出嚟，亦都係代表可以稍微放縱自己嘅肚皮啦，反正食肥少少咪用件大䄛遮一遮囉（好似係）。香港人最愛嘅火鍋加埋任食，仲唔係下次成班朋友一齊「滾」起佢嘅最佳選擇？
新鮮海鮮火鍋放題 大煲皇煮廚
開飯仔溫馨提示，嚟荃灣呢間餐廳食放題先睇清楚Menu，因為手切安格斯肥牛同海鮮拼盤都係指定數目而唔係任食，費時有任何誤會啦，不過唔少食客都話放題免費任添嘅肥牛質素其實都唔錯。最抵讃嘅係按人頭送嘅海鮮拼盤夠哂新鮮大份，特別係蟶子同生蠔。另外可以任點嘅材料亦有海蝦同女士最愛嘅花膠，頭盤又有刺身或者雞煲揀，算唔錯啦。
食埋蒸海鮮+刺身 八幡屋涮涮鍋
貪心想打邊爐又想食埋蒸汽鍋？得，只要你胃口夠大，嚟旺角呢間日式放題店就可以一次過滿足蒸海鮮+日式刺身+涮涮鍋三個願望！本身佢地嘅任食涮涮鍋質素已經相當有水準，必食嘅牛肉同豬肉之外，各式丸類同蔬菜選擇亦夠多。額外加錢就可以食埋三層海鮮蒸汽鍋，有蜆、扇貝同大蝦等。最後等緊嘢食熟嘅時候仲可以食埋刺身，大胃王都一定夠滿足。
水準平均湯底加分 大鍋口海鮮火鍋店
如果你同朋友都係無肥牛不歡嘅標準食肉獸，咁就可以考慮旺角呢間火鍋專門店，因為唔少食家都讃佢地嘅任嗌嘅肥牛雖然唔係特別靚，但難得唔係得肥膏多到無肉食嗰種，可以Encore多幾碟。另外其他配料例如海蝦同墨魚滑都唔錯。最後加分嘅係佢地嘅湯底，免費嘅椰子滑雞湯底夠香甜，胡椒豬肚湯底少少辣夠開胃。
任食韓式部隊鍋 K-POT 部隊鍋
圖：喬子
任食火鍋唔係港式餐廳就係日式放題店？少年你太年輕了，其實韓式部隊鍋一樣有！荃灣呢間韓國菜餐廳就有韓式涮涮鍋放題，價錢按你揀嘅牛肉種類會有唔同。最特別嘅係湯底有韓式部隊湯同高麗人參雞湯揀，唔啱嘅仲有沙爹、豬骨同麻辣等湯底。而且韓式配料亦有唔少，例如一串串嘅韓式魚蛋同各款年糕，啱哂韓國菜Fans去大飽口福。
實惠火鍋+Froyo任食 好一鍋海鮮火鍋專門店
佐敦呢間火鍋專門店都有唔少捧場客，勝在火鍋配料選擇唔少而且當中唔少質素都唔差之外，佢地嘅特色湯底例如花雕醉雞湯或者越式龍蝦湯底都夠哂真材實料，湯底鮮味夠嘅話咁落咩配料都更好味啦。最後佢地仲有部Frozen yogurt機畀食客任擠任食，連Topping都有好幾款任揀，連甜品胃都滿足埋。
泰式椰子雞湯變湯底 SIAM AI Fresco Dining
圖：<IVY>
中日韓火鍋都試過哂？得，咁轉泰式啦！九龍灣呢間泰國菜餐廳成間玻璃屋咁，景致都唔錯。泰式任食火鍋有冬陰公、椰汁雞湯同冬瓜排骨三個選擇。特別係椰子雞湯奶白色幾香濃又有香料香味，鐘意嘅可以就咁飲少少當開胃。雖然配料選擇唔算太多，亦無乜泰式特別食材，但無將貨就價，質素Keep到唔錯。
懷舊裝修+Minions芝心丸 開餐達人
觀塘工廈近年多咗唔少特別主題餐廳，呢間以復古做主題，有唔少八九十後一定好熟悉嘅那些年玩意。而佢地晚市嘅三格格火鍋都相當有玩味，三格格其實係指湯底有三格，可以自己配搭心水湯底。配料方面，老實講肉嘅水準麻麻，唔少人都會將自己胃嘅Quota留畀台灣直送丸類，必試Minions芝心包，印住Minions得意大頭之餘仲有芝士流心效果！
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
1. 牛頭角特色食店攻略
隨時接收最新資訊
讚好OpenRice專頁！