鰻魚已經唔再淨係出現鰻魚飯或者鰻魚壽司度喇，由上年開始，鰻魚已經靜悄悄咁入侵各類食品，好似鰻魚漢堡、鰻魚飯糰咁，嚟到今年，就再進化到鰻魚多士喇！

喺上環有間新開一個月左右嘅多士專門店，主打各式各樣嘅多士，但唔係奶油多或者西多士喎，而係夾住唔同日式食材同醬料嘅創新多士。當中首要介紹嘅就係蒲燒鰻魚玉子多士。

喺兩塊搽上牛油再烘香嘅方包中間，夾住滑蛋同蒲燒鰻魚，淋埋醬汁同紫菜呀木魚絲呀咁，完成。BTW唔使驚話啲汁會整到塊包淋晒，因為師傅特地調配過，啲醬汁係比食開嘅稠身㗎。食落都幾夾嘅，但如果條鰻魚再大條啲，就會再開心啲啦。

大蝦蟹子沙律多士，睇個名都知齊晒啲料，炸過嘅大蝦係脆口嘅，配埋日式沙律食，感覺冇咁熱氣。

千島墨魚餅多士，就係炸墨魚餅加千島醬，再夾埋清新嘅青瓜絲落去，趁熱食，脆脆地。另外仲有其他幾款多士同飯類，喺上環返工嘅朋友，早、午、下午茶餐又有多個選擇喇。

百味日式吐司專店
地址：上環干諾道中168-200號信德中心澳門廣場3樓3030號舖

文、相：Kar