沙田區一直都唔喺美食沙漠嘅名單中，但要講有咩好食嘅餐廳好似又唔係好講得出，不過其實沙田區最近都有唔少新餐廳開張同隱藏美食店，如日本過江龍壽喜燒專門店、精緻日式串燒、人氣韓國菜外賣店、手抓海鮮火鍋餐廳同主打豆腐嘅甜品店，準備去搵食嘅朋友記得bookmark啦！

東京米芝蓮壽喜燒名店 日山 

去唔到旅行又想食正宗壽喜燒，呢間來自日本嘅過江龍壽喜燒就啱晒！餐廳於日本連續九年獲得米芝蓮一星級榮耀，繼兩年前首次進駐尖沙咀後，最近終於喺沙田開埋分店，沙田嘅街坊們有福啦。餐廳主要供應壽喜燒及涮涮鍋套餐，主角壽喜燒先用牛脂起鍋，放入野菜如日本大蔥、洋蔥、冬菇同豆腐煎香，再依次加入壽喜燒醬汁同水調味，壽喜燒湯汁由東京廚師親自熬製完成再空運來港，入口濃郁，甜味恰到好處。牛肉選用A5黑毛和牛西冷，和牛花紋有如大理石，入口即溶，滿滿油脂香。

日本鳥居主題串燒 幸匠燒 

以日本鳥居及神社為主題嘅串燒店，同樣係新進駐沙田。餐廳主打多款特色創意串燒，推介福岡豚肉草莓卷，新鮮大粒嘅日本草莓配上充滿油脂嘅豬肉，點上香甜嘅煉奶，鹹鹹甜甜令人愈食愈開胃，酸甜嘅草莓更有助中和豬肉油膩感。另外鍾意食芫荽嘅朋友要試埋福岡豚肉芫荽卷！海鮮類嘅話大推白燒活鰻，外皮燒得好香脆，魚肉有彈性而且充滿魚油香，必試！九州槍魷魚燒都係另一道好受歡迎嘅菜式，爽口彈牙醬汁惹味。

圖: sleepbeauty

人氣韓國菜外賣店 Zan Chee

一開就好有人氣嘅韓國菜，餐廳由韓國人主理，夠晒韓國風味！淨係前菜都有成五十款選擇，除咗基本款泡菜同菠菜等，另有香港少見嘅鵪鶉蛋、醃蒜頭粒、辣醃蒜心同醃牛蒡絲等，真心唔多地方搵到！韓國便當則可以自選主菜加5款配菜，自己鍾意點配搭都得。另外有埋韓式醬油蟹、小炒、湯品同炸物，絕對可以一解思鄉之愁～

圖: Alcyin

手抓海鮮火鍋店 Seafood ghost 

石門可以話係沙田區新興嘅搵食熱點，呢間餐廳主打海鮮同日式火鍋，推介嘅有招牌手抓海鮮餐，食法有啲似ShakeShake海鮮袋咁，一人份份量都好多，海鮮種類豐富，包括本地龍蝦、肉蟹、草蝦、綠青口、鮑魚、沙白、魷魚以及翡翠螺等，可以配搭四款口味如新加坡黑胡椒、港式避風塘、泰式香辣同蒜蓉牛油～如果想食火鍋嘅，餐廳另一名物壽喜燒套餐都值得一試，香甜惹味送飯一流！

圖: Shin92yeung

豆腐花＋炸芋圓 豆腐巴克

主打豆漿同滑捋捋豆腐花嘅店舖，不過最出名嘅甜品係佢哋嘅一口炸芋圓，炸得香脆嘅芋圓加上香甜煉奶，炸過後口感更煙韌，芋圓同番薯嘅香氣都無被蓋過～除咗甜品鹹點都有驚喜，自家製雲吞有韭菜、菜肉及粟米豬肉餡，皮薄大粒飽滿，另外所有炸物如一口花枝丸、炸魚蛋同炸燒賣都係即叫即炸，入口熱辣辣配埋甜品食真係好正！

圖: emmi

文: Yanica