睇「不要對我尖叫」呢個名真係未必知係賣咩，原來係台灣藝人丫頭主理嘅一間茶飲店！店名後綴係日常茶間，主打使用天然材料，加上品牌獨特精神，希望成為大家日常嚟飲杯茶休息下嘅地方。
 

茶飲店由台灣藝人丫頭主理

不要對我尖叫海外第一間分店坐落中環，轉角一間白色簡約茶屋頗有台灣文青風格。事實上因為店名同杯上面嘅字句夠特別，加上飲品同配料選擇多元化，喺台灣當地亦相當受歡迎。中環店用嘅茶葉等材料都由台灣運到香港，唔添加濃縮果糖而係用食材本身甜味，清爽無負擔，所以丫頭都話就算每日飲都唔怕變肥唷。
 

香港限定+招牌飲品

冬瓜菊花茶（中環店開店限定玻璃樽）（$68）

品牌創辦人表示因為想先掌握香港特色再開發新口味，因此暫時未有香港限定飲品。但大家都唔洗失望住，中環店就有呢個特別版玻璃樽，香港限定台灣都無！玻璃樽可以重用方便大家可以留個紀念，不過就限定300支，想入手就要快！
 

冬瓜菊花茶（杯裝）（$18）

招牌飲品就係呢杯冬瓜菊花茶，用台灣老字號嘅冬瓜磚熬制冬瓜茶，再搭配杭菊菊花水，形成天然漸層。裡面仲有菊花，賣相先贏。搞勻飲嘅話會先聞到菊花既清香，之後係冬瓜茶嘅甜味，層次分明，一改普通冬瓜茶過於甜膩嘅缺點。
 

莓果洛神氣泡飲（$26）

同樣係亮眼嘅漸層賣相，呢杯氣泡飲就以莓果搭配洛神花，雜莓嘅酸甜加上洛神花香同氣泡水Sparkling口感，清新可口。
 

 
三大特色配料

玫瑰鮮奶茶（$28）+ 白玉珍珠（+$6）

所有飲品都可以加配料，白玉珍珠Q彈煙韌，增加口感又唔會搶去飲品味道，係最百搭嘅配料。而玫瑰鮮奶茶亦記得先搞勻再飲，玫瑰香濃郁，同紅茶餘韻配合得唔錯。創辦人表示因為香港人飲奶茶口味比台灣人濃，所以有特別調整奶茶配方。
 

茉莉綠·現泡附茶包（$16）+ 爆漿珍珠（+$6）

爆漿珍珠顧名思義，即係爆開會有果汁嘅珍珠！當中有荔枝同百香果兩款，香甜富果香，所以唔建議加喺有奶既飲品當中。而品牌特別請台中一間有40年歷史嘅老茶莊配製茶底，綠茶選用台灣高山茶，加茉莉花燻製後味道回甘帶幽幽花香。
 

桂花雨林（$18）+ 地瓜芋圓（+$6）

甜品大熱嘅芋圓呢度一樣有！而且係迷你版本，用粗身飲管好易就飲到。口感軟糯，而且咬落真係有淡淡地瓜同芋頭味道。而桂花雨林即係桂花紅茶，茶底選用錫蘭紅茶，加上桂花甜味之後變得易入口又唔會太淡。
 

相信大家都會好奇點解品牌名係「不要對我尖叫」？原來係當初創業嘅時候身邊有反對聲音，但佢地想堅持自己覺得啱嘅事，所以係想對反對嘅人講唔好再設框架畀年青一代嘅意思。而「，日常茶間，」一方面指希望成為大家每一日都可以嚟嘅茶店，逗號係代表每一個生活嘅片刻，而品牌無論上一個定下一個片刻，都提供茶飲陪伴大家。亦希望大家可以停低品茶，享受生活當中嘅美好。
 

細心啲睇，無論係凍飲杯定熱飲杯上都寫上字句，唔單止代表品牌精神，背後亦有心思！考慮到想飲熱飲可能係因為心情比較低落需要溫暖，所以寫上「討拍」求安慰嘅感性句子；而平時飲凍飲嘅話，就係鼓勵大家樂觀正向既句子喇。
 

（左）品牌創辦人Tony、丫頭、Jeff

不要對我尖叫 {，日常茶間，}
地址：中環擺花街23號

文：相、片：Cathy