台灣藝人丫頭創立嘅茶飲店開到戲曲中心，仲為汪阿姐設計咗一杯限量發售嘅特調！聽汪阿姐唱熱咖啡就聽得多，到底汪阿姐特飲係咩味？另外仲有新店限定普洱特調，唔同配搭適合唔同年齡層嘅朋友享用，落足心機㗎。
 

台灣藝人兼品牌創辦人詹子晴（丫頭）同香港殿堂級藝人汪明荃（汪阿姐）出席新店開幕典禮

不要對我尖叫，日常茶間，香港第二分店位於西九文化區當中嘅戲曲中心，開幕當日仲搵嚟汪阿姐做嘉賓！雖然台式飲品同大戲睇落好似無乜關係，但丫頭嘅品牌以慢活為理念，同歷史悠久嘅戲曲其實都有相似嘅地方。
 

汪阿姐特調（香茅檸檬薑蜜）（$32）

為汪阿姐設計嘅特調特別用咗可以開聲潤喉嘅薑蜜，甜中帶辛！加埋檸檬同香茅，前者增添微酸嘅清爽感，後者帶嚟獨特嘅香味但又唔會蓋過檸檬薑蜜嘅味道，夏天飲夠晒消暑解渴。而且丫頭話薑有助暖胃同降血脂，女生們飲就最啱啦。
 

蜂蜜普洱鮮奶茶（$26）

而丫頭最鍾意嘅新飲品係呢杯蜂蜜普洱鮮奶茶，一嚟因為佢哋嘅奶茶都係用鮮牛奶代替坊間部分餐廳用嘅奶精，飲落味道自然無負擔。二嚟係選用陳年普洱配搭潤喉蜂蜜，茶嘅醇香同蜂蜜嘅清甜相輔相成。
 

  

蜂蜜菊花普洱（$22）

想再清爽啲嘅話可以試呢杯蜂蜜菊花普洱，加入帶甘味嘅杭菊同菊花水，增加一分清香之餘，仲會見到有一朵朵菊花。蜂蜜普洱暫時係戲曲中心新店限定，丫頭解釋因為唔少嚟戲曲中心嘅年紀都比較大，所以特別推出味道醇厚濃郁嘅普洱茶。
 

洛神蜂蜜菊花（$22）

其他招牌飲品，例如洛神蜂蜜菊花、冬瓜菊花（$18）、玫瑰鮮奶茶（$28）等當然亦繼續供應。九龍區嘅Fans以後就唔使過海去到中環都飲到丫頭主理嘅台式飲品啦！
 

不要對我尖叫，日常茶間，
地址：尖沙咀柯士甸道西88號戲曲中心LG樓1號舖

文：Cathy
相、片：Tom Li