去蘭桂坊Happy Hour就聽得多，無諗到呢區居然開咗間裝修走波希米亞風嘅Cafe，打卡位超多之餘亦有照顧唔同飲食需要，供應純素全日早餐、生酮蛋糕等唔同選擇。特別推介佢哋嘅意粉，好似自家製蕃茄乾醬烤大蝦意粉，味道豐富又唔膩。
 

角落位於中環，裝修走波希米亞風，以木為主調，放咗鞦韆、乾花、織繩擺設等，感覺溫暖舒適。加上霓虹燈牆同大玻璃窗，打卡位真係好多！食物分量同價錢都合理，加上有純素、生酮等選擇，開咗無耐就吸引到一班OL熟客。
 

超級碗（$78）

分量十足嘅沙律，以羽衣甘藍沙律為基底，加上烤紅菜頭、藜麥、西柚、牛油果、石榴，唔少都係高纖維低熱量嘅Super Food，而且夠大碗當Lunch都夠晒飽呀。而如果想食暖沙律，就可以試烤菜沙律碗。
 

自家製蕃茄乾醬烤大蝦意粉（$138）

用天然食材配搭香草帶出食材原味，醬汁用意大利蕃茄、蕃茄乾、洋蔥、羅勒等製作，因為加咗蕃茄乾，令味道更為濃郁！配搭大隻彈牙嘅烤虎蝦，同有嚼勁又掛汁嘅天使麵，啖啖鮮甜。
 

Vegetarian All Day Breakfast（$138）

純素都可以好豐富！呢份純素全日早餐就有純素芝士焗扒菇、素炸雞、新鮮沙律、蕃茄燴豆、薯餅、牛油果醬多士。驚喜位在於Juicy嘅扒菇加上半融純素芝士真係好香口，而素炸雞無論口感同味道都同真炸雞幾似。牛油果醬保留部分果肉口感增加層次，Creamy得嚟又唔膩。
 

Crème Brûlée Cheesecake（$48）

甜品會有唔同款式嘅蛋糕，最搶眼嘅有呢款即點即燒焦糖嘅焦糖芝士蛋糕，再加上玫瑰花瓣點綴，香氣加倍。焦糖香脆微苦，帶出芝士蛋糕嘅香甜。而芝士蛋糕當中仲有香蕉片，食落口感同樣軟滑，更增添香蕉味道。採訪當日仲有Keto Cheesecake同Keto Chocolate Cake（各$88）呀。
 

Keto Coffee（$45）

為咗配合生酮飲食高脂少醣嘅模式，呢杯生酮咖啡加咗椰子粉同牛油，飲落以椰子香為主，口感厚滑。
 

Rose Latte（$38/Medium，$42/Large，$46/Iced）

House Blend咖啡係印尼、巴西、哥倫比亞拼配，偏Nutty風味而且口感厚實。加上玫瑰後花香濃郁，甜度適中無蓋過咖啡香，味道平衡。
 

角落 
地址：中環德己立街23號晉逸蘭桂坊精品酒店2樓

文：Cathy
相、片：Calvin Kwok