Soho區酒吧就見得多，呢間新餐廳全店粉紅色，行入去唔賣酒賣特色飲品同手作甜品！好似用料講究嘅紅豆沙、打卡一流嘅櫻花拿鐵、即叫即整嘅梳乎里班戟、酸酸甜甜嘅窩夫撻等等。加上擺設糅合中西特色，絕對值得嚟食嘢兼打卡！
 

飲吧係一班年輕朋友一齊開嘅，店名嚟自朋友平時最鍾意講嘅「飲啦！」，轉為書面語又扣返「水吧」嘅意思。因為想開一間帶畀人開心嘅餐廳，所以除咗飲品亦有賣各式各式甜品。小店對面就係PMQ，附近有唔少酒吧，呢度裝修就走「中西合璧」風格，好似港式嘅花紋地磚、霓虹燈、西式嘅吧枱等等。
 

十年陳皮奶蓋紅豆沙（$100）

一杯紅豆沙要$100？皆因特別選用十年新會陳皮，唔單止煮紅豆沙嘅時候有落去帶出香氣，奶蓋上亦特別撒上陳皮碎，未飲就先聞到一陣陳香。聞完香味之後就搞勻奶蓋同紅豆沙享用啦，奶蓋特別調配成少甜，唔會蓋過紅豆沙嘅甜味，又令杯飲品更厚滑。紅豆沙起沙之餘亦保留少少紅豆粒口感，甜度比坊間糖水鋪嘅低，反而陳皮香更突出。
 

粉紅櫻花拿鐵（$39）

少女打卡飲品之一，粉紅色襯返間Cafe而且又少見。店主特別選用韓國櫻花味紅絲絨粉嚟調配呢杯拿鐵，而唔係好似坊間一般用鹽漬櫻花，所以飲落無奇怪嘅藥水味、或者得個鹹字無花味。忌廉上亦撒上日本櫻花粉，花香自然，飲落味道就有啲似杏仁味。
 

黑炭黑芝麻杏片梳乎里班戟（$58）

即叫即製嘅梳乎里班戟上面係混合黑炭粉同黑芝麻嘅忌廉，再加焗過嘅杏仁，最加分嘅係忌廉嘅芝麻香好出，甜度又啱啱好。而梳乎厘班戟就係屬於非常富空氣感，入口即溶嘅類型。裡面輕盈得嚟濕潤又唔係未熟，不過如果係鍾意有啲咬口嘅朋友仔就未必啱喇。
 

 

沖繩海鹽檸檬QQ窩夫撻（$58）

窩夫撻其實係碗狀嘅窩夫加上雪糕，而沖繩海鹽雪糕仲係亮眼Tiffany Blue色，又係「相機食先」嘅代表！海鹽雪糕味道先甜後鹹，加上帶酸嘅檸檬醬食落冰涼清爽。窩夫口感偏硬身，帶少少煙韌。
 

4件套裝撻（$78）

最啱咩都想食啲嘅甜魔們，可以揀四款唔同口味，開飯仔呢次就揀咗玫瑰車厘子、檸檬卡士達、紫薯，同朱古力。撻底幾脆，味道就以酸香柔滑嘅檸檬卡士達，同紫薯味濃郁而唔死甜嘅紫薯兩款比較突出。玫瑰車厘子果醬香自然，但略嫌無乜玫瑰味。而朱古力甜度適中，味道中規中矩。
 

飲吧
地址：中環蘇豪鴨巴甸街42號地舖

文、相、片：Cathy