號稱喺台灣開店超過100間、大陸200間，加拿大、菲律賓、英國都有分店嘅台灣手調飲品店一芳台灣水果茶近日嚟香港快閃開業兩星期，聽落就幾架勢嘞，唔知味道又點先？開飯仔今日一於去踩場，試勻佢主打嘅手調飲品，即睇試味報告！

一芳主打水果茶，所以今次快閃會帶來6款混合水果醬汁而成嘅手調飲品，有一芳水果茶、粉圓鮮奶茶、古釀冬瓜茶、金鑽鳳梨綠、埔里百香綠及純釀楊桃汁。同其他飲品店一樣，甜度、冰度都可以落柯打時一併要求架！

作為舖頭皇牌嘅一芳水果茶($30)果然零舍不同，以自家製鳳梨醬、蘋果、橙、百香果以及青茶而成。味道好清新，而且水果味道好natural，明顯唔係糖漿溝出嚟，而且仲咬到粒粒百香果添，增加口感。

粉圓鮮奶茶($30)，將粉圓與黑糖熬煮，再倒入紅茶奶茶等配料沖成。紅茶茶膽係用真正原塊茶葉沖出嚟，而茶葉係來自與品牌合作嘅台灣小型農莊。

(中)金鑽鳳梨綠($25)，以鳳梨醬配搭綠茶，味道酸甜之餘更有綠茶清香。(右)古釀冬瓜茶($20)，選用台南市東山冬瓜，每日以人手熬煮冬瓜露，冬瓜味濃。除咗水果、鮮奶，飲品配料均來自台灣，好似製作冬瓜茶嘅冬瓜磚咁，從台灣一磚一磚咁運到香港，再用水加熱煮成冬瓜露再調配而成。

嚟個大合影先！(由上至下、由左至右)金鑽鳳梨綠、純釀楊桃汁($25)、古釀冬瓜茶、一芳水果茶、埔里百香綠($25)、粉圓鮮奶茶。

幾時香港有實體店？負責人表示大約11月會喺鬧市旺區開舖頭，至於確實喺邊？自己領悟下啦！

一芳中秋pop-up store
營業日期及時間：即日起至10月8日10am-10pm
地址：觀塘觀塘道418號APM LG層一田超市內

文：Joy