柔和、夢幻嘅Tiffany Blue色風靡全球萬千少女心，嚟緊全亞洲第一間，全球第二間嘅The Tiffany Blue Box Café即將就會喺尖沙咀開業喇！各位女生們請盡情尖！叫！

餐廳嘅主色調當然就係tiffany blue啦，一格格銀藍色嘅玻璃牆身，透出自然日光；座位、餐具都係tiffany blue色，就連甜品本身亦都帶有tiffany blue，總之一入到去，就好似整個人進入咗個tiffany blue嘅世界，grand得嚟又幾悠閒嘅感覺。

各位粉絲就梗係要去嘆返個Tiffany 下午茶啦，以傳統三層架奉上。最頂層有5款甜品，包括最具品牌特色嘅Tiffany鳥巢——脆米粉伴棉花糖朱古力。另外仲有咖啡忌廉味嘅Blue Box閃電泡芙、以白桃果蓉同香檳啫喱而製嘅香檳珍珠、士多啤梨三重奏：新鮮士多啤梨、士多啤梨忌廉慕絲同士多啤梨啫喱等。

第二層係鹹點，同樣都係有5款。舖滿魚子醬嘅魚子醬撻、好似粒車厘子咁嘅係鴨肝醬凍球，面層仲有啲開心果碎、黑毛豬火腿伴埋蕃茄莎莎同多士又格外鹹香等等。最底嗰層就係包點。茶餐選配指定啡茶，特別推介自家茗茶No. 727 The Tiffany Blend，以中式紅茶作基調，加入玫瑰、薰衣草、雲呢嗱等，茶香中又帶有花香。

另外，其他時段亦各有特色menu，好似breakfast/brunch就有份大大份嘅花生醬班戟，口感鬆軟富蛋香，面頭嘅朱古力花生醬更係自家調製嘅，伴埋海鹽牛油同蜂巢糖脆，鹹甜交集，一朝早就有種滿足感。

方形嘅丹麥麵包亦係早餐嘅不二之選，軟熟鬆化，仲有粒Tiffany blue色嘅海鹽牛油喺頂添，零舍醒神。切開入面係香蕉焦糖醬，夠晒sweet池。

Main course則有多款西式飯或意粉選擇，最有睇頭嘅係呢款龍蝦扁意粉。醬汁以龍蝦蝦頭同蝦殼熬煮超過12個鐘㗎，加入埋干邑調製，味道濃郁，龍蝦肉鮮爽彈牙。

焦糖爆谷朱古力撻就啱晒甜魔喇，成座塔咁高嘅焦糖爆谷冚住嘅，係榛子杏仁朱古力醬同馬斯卡彭芝士。

如果想食呢個招牌盒仔蛋糕嘅，記得要做兩件事。第一，call人；第二，預訂！個cake話大唔大話細唔細，都要6-8個人先食得晒，如果你哋人太少就未必食到喇。同埋呢個cake只限預訂，訂枱嗰陣記得卜埋啦~ 介紹返先，呢個tiffany blue嘅禮物盒係香港獨家口味嚟，內層分別係海鹽焦糖慕絲、白芝麻慕絲同杏仁朱古力脆脆加朱古力海棉蛋糕。

打卡嘅話唔好漏咗呢杯cocktail呀！Statement Blue！將接骨木花有汽水同vodka倒落藍色棉花糖球度，望住佢慢慢溶化好治癒。

The Tiffany Blue Box Café
地址：尖沙咀北京道1號地下208號舖
預計開業日期：10月14日(星期一)

文、相、片：Kar