香港越開越多飲品店，呢間台灣過江龍人氣依然不減，仲由尖沙咀開到旺角！新店空間更大，選擇當然亦更多。包括率先推出嘅雪絨系列，同新店限定嘅「大口吃」水果茶，當然唔少得品牌最出名嘅黑糖珍珠，為你呢個夏日帶來更多消暑飲品！
 

鹿角巷香港第二間分店選址旺角，紅磚牆、鹿頭裝飾加上吧枱更方便大家打卡。新張期間更會一口氣推出兩個新系列。
 

細棉雪絨奶蓋系列

雪絨即係芝士奶蓋，自家製芝士奶蓋口感相當細棉而Fuffy，入口即溶，的確幾切合雪絨呢個名。先品嘗到芝士嘅微鹹，之後係牛奶嘅天然甜味。
 

雪絨黑糖鮮奶茶（$30）

而呢杯雪絨黑糖鮮奶茶嘅奶蓋上面仲會再灑上黑糖，香甜討喜。建議享用方法係打開蓋，打斜杯大啖飲，就可以一次過飲到芝士奶蓋同下面嘅黑糖鮮奶茶啦。
 

雪絨白桃烏龍（$30）

而呢杯白桃烏龍相比起嚟就比較Light，芝士奶蓋上面係白桃乾碎粒，更突出芝士香味。而白桃烏龍茶有自然嘅白桃甜味，最後有烏龍茶嘅回甘，令成杯飲品層次更分明。
 

 
食得嘅水果茶系列

旺角店限定嘅「大口吃」水果茶，顧名思義即係可以畀大家大啖食嘅水果茶，因為三款口味都加入唔少水果果肉，酸甜消暑之餘又有咬口。
 

焦糖菠蘿（$30）

將菠蘿加到水果茶裡面相當常見，但呢杯特別將即開新鮮菠蘿片燒兩次，第一次輕烤鎖住果汁，之後加糖再燒第二次變成焦糖菠蘿，香甜脆口。而綠茶底加上菠蘿果醬、熱情果蓉同蘋果片，味道微甜而且綠茶清香突出。
 

烤焦西柚（$30）

呢杯嘅西柚肉同樣加上焦糖，下面係用西柚、荔枝、綠茶同冰粒打成嘅沙冰。飲落先品嘗到西柚嘅微澀，後韻係荔枝嘅甜味，相當清爽。
 

茉香柳橙（$30）

原橙上咁誇張？因為真係用咗成個橙嚟挖出嚟嘅橙肉同橙汁，再加入特調水果綠茶。所以飲落啖啖都有果肉，最啱鍾意有咬口嘅朋友仔。
 

尖沙咀店唔少人排隊買嘅黑糖鹿丸旺角新店一樣有，用台灣黑糖熬煮兩個鐘頭，保證黑糖夠入味，口感又依然Q彈。
 

小鹿出抹（$32）

抹茶以幾個日本品牌嘅抹茶粉調配過，再倒入日本明治牛奶當中，同黑糖珍珠形成搶眼嘅漸層賣相。抹茶茶香同回甘明顯，就咁飲可能會有少少澀，但混合埋黑糖一齊享用就味道平衡。
 

新店地方更大，非常貼心地仲有插頭位同USB位畀大家幫手機叉電。最後提提大家，因為製作需時，「大口吃」水果茶暫時只限14:00同18:00兩個時段，三款口味各售10杯。而雪絨系列同黑糖鹿丸亦係數量有限，可以嘅話盡量早少少嚟買啦。
 

鹿角巷
旺角西洋菜南街2J-2Q號新江大樓地下3號舖

文、相、片：Cathy