掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！至於掃街熱點，多到接近區區都有，一於逐區去睇下。今次講下長洲先。
嚟緊就係太平清醮，唔少人都會趁機入長洲趁下熱鬧。一場入到去，當然唔可以放過任何一個食好西嘅機會啦，之但係你都唔想食嚟食去都係大魚蛋同芒果糯米糍架？試下呢幾間新貴啦~
脆炸海鮮 漁樂
圖：長洲近海，當然就多海鮮。呢間舖主要食炸海鮮嘅，不過就冇一個特定嘅menu，會因應每日捕獲到嘅海鮮而有變化。好彩嘅話撞啱有炸池魚，記得食。細細條，連骨食埋都OK，層皮炸到脆卜卜，魚肉又夠軟嫩，仲好鮮下，送酒飲開心度會更高。另外炸鱭魚都一樣係魚有魚味，仲有提子同酸瓜伴碟，清一清膩，唔錯。
火焰牛油果班戟 Corner Garden Crepes & Drinks
話佢係隱秘小店都冇錯，唔喺大街，而係要轉入小巷先搵到呢間舖。主打班戟，鹹嘅甜嘅都有，仲有得配movenpick雪糕，最受歡迎嘅當然係nutella香蕉或者流心朱古力味啦，但今次想同大家推介嘅係火焰牛油果班戟。即叫即製，睇住檔主將切好嘅牛油果放上煎好嘅pancake皮上，唧埋蛋黃醬再用火槍燒幾燒，捲起個樣唔算好驚艷，但食落的確有驚喜，鹹鹹香香好惹味！
文青冰滴咖啡 啡寮
鍾意飲咖啡嘅朋友，點都要擠啲時間嚟呢間咖啡店。係長洲本土嘅後生仔開嘅，一入舖已經見到一壺壺冰滴咖啡喺度滴漏緊，散發住一種啡味。想要呃like影相嘅就揀椰皇冰滴咖啡啦，無誤。用原個椰皇裝住啲咖啡，係幾有睇頭，飲落都有淡淡椰青嘅甜。而如果好甜嘅話，建議可試檸檬蜂蜜冰滴咖啡，呢隻咖啡豆嚟自埃塞羅比亞，帶有果香味，同檸檬幾夾，飲落唔太苦澀之餘仲有種香甜。呀，呢度唔係淨得咖啡，朱古力同茶都有。
即叫即製手卷 和屋
圖：loveatcc
呢間舖頭都幾多種嘢食，手卷又有、魚生飯又有、章魚燒又有、炒雪糕都有，有選擇困難症嘅朋友嚟到應該睇到頭都大晒，兩三個字都未必揀到食咩。蟹三味係幾推介嘅，即係蟹子蟹柳同蟹膏，蟹子同蟹膏份量都唔少呀，各佔一半㗎，鹹香惹味。火炙芝士蟹子章魚丸同樣吸引，尤其是係嗰塊燒到半溶嘅芝士！
三色芋圓冰 長洲冰室
掃街掃到攰攰地，想搵個地方坐下（但繼續食）嘅，呢間冰室係個幾好嘅選擇（當然想拎走都得），仲要有香港人最鍾意嘅芋圓！見到就吸引。招牌綜合三色圓係幾豐富嘅，一碗有齊晒地瓜圓、芋圓、紫薯圓，仲有仙草，同一粒粒薏米、西米、珍珠、紅豆等等，之但係整體味道偏淡，如果甜魔或者食開重口味嘅朋友仔就未必太喜歡喇。至於泰式奶茶三色圓冰，夠多色，剉冰頂頭仲要有多球雪糕，加埋隨意嘅奶茶淋醬，賣相已經贏晒分，不過建議一開始就請店員落多啲奶茶醬，唔係食到底，啲冰開始溶，就沖淡咗啲味喇。
文、相：Kar