Poke Bowl夏威夷魚生飯呢幾年喺香港愈來愈流行，其實咩係Poke Bowl？同日式魚生飯又有咩分別？Poke Bowl係由魚生、多款配料、飯同醬汁組成，可以自由配搭自己鍾意嘅食材，色彩繽紛之餘，健康又飽肚，係唔少現代女性醫肚好選擇～今次介紹5間Poke Bowl專門店畀大家，每間都各有特色，一齊睇下邊間啱心水！
A Bowl (鰂魚涌&上環)
圖: foodiemenus
呢間Poke Bowl專門店喺鰂魚涌同上環都有分店，自選Menu選擇好多元化，而且主菜、配料同醬汁都幾有特色。主菜方面除咗普通魚生類，仲有慢煮牛柳配秘製番茄醋同白松露醬慢煮雞胸等，前者味道清爽，後者白松露味都幾香濃，啱晒唔食魚生嘅朋友。配料就有香甜嘅時日本蜜糖燒南瓜及自家製煙肉芝士薯仔沙律，誠意之選～醬汁呢就推介夏日芒果wasabi醬同金柚柚子蛋黃醬，愈食愈開胃！
Peek-A-Poke (銅鑼灣)
圖: jcpigpigzhu
喺銅鑼灣成日都要排隊嘅Poke Bowl，已經設計咗幾款配搭，啱晒有選擇困難症嘅朋友～好似招牌夏威夷風味有吞拿魚刺身、新鮮海帶芽、紫洋蔥、蟹籽同鰹魚醬油，健康之餘味道都好豐富，配埋粒粒蟹籽口感仲好。另外想再清新啲可以試下輕營之選，包括刺身三文魚、番茄、青瓜同蜜糖香醋汁，夠晒營養～全部都可以自選跟壽司飯、珍珠糙飯、沙律菜或者混搭都無問題㗎。小食方面火山炸雞同鋼絲蟹卷都幾有驚喜。
Pokéworld (上環)
圖: 喺上環屹立多年嘅夏威夷魚生飯專門店，呢間特別在於除咗有Poke Bowl食，仲有外國好流行嘅Pokiritto，即係夏威夷魚生同墨西哥捲(Burrito)嘅組合，簡單啲嚟講就係將Poke Bowl嘅食材包入一個卷入面，適合忙碌嘅上班族！招牌包括高蛋白質嘅海鮮飯卷、惹味辣魚生牛油果飯卷、虎蝦豆腐蕎麥麵同高蛋白海鮮溫泉蛋飯，想要增肌吸收多啲蛋白質嘅朋友就啱晒～
PokéToké (旺角)
圖: charfeteria
喺旺角新開無耐嘅Poke Bowl，蓋飯底一樣可以自選跟壽司飯、沙律菜或二合一，主菜包括三文魚、吞拿魚、慢煮雞肉、虎蝦仁同雜錦香菇，配菜都有廿款任選～呢度最大特色係Poke Bowl特別大碗，就算男士食都一定夠飽呀。除咗Poke Bowl仲有供應多款炸物同飲品，黃金炸蟹鉗香脆彈牙，咩都想食啲都可以叫個炸物拼盤試下～
Pololi (中環)
圖: soya1314
呢間Poke Bowl 開喺中環，比較特別係佢有超多款醬汁揀，主要分辣同唔辣，唔辣嘅選擇包括牛油果沙律醬、姜蔥醬、泰式醬同芥辣味噌；辣就有麻辣醬、叄峇醬同辣味花生醬等，坊間比較難搵到咁多啊，平時食開Poke Bowl嘅朋友要試下！除咗見開嘅配料，呢度仲可以加埋nuts同水果，成個Poke Bowl味道上更有層次，幾有驚喜。
文: Yanica
