鍾意周圍食嘢嘅朋友，對於元朗呢個地方，又愛又恨，如果唔係住新界西，又真係遠咗少少，但係鬼叫入面成日都好多好嘢食咩，於是去一轉，就好似吃貨一日遊咁由朝食到晚。最近，又有唔少話題新店開張，係時候集埋一堆又一次過去食喇。

布甸燒   小確幸

布甸燒係嚟自札幌嘅甜品，三層分別係雞蛋布甸、芝士蛋糕同焦糖，而「燒」就係指喺蛋糕面烙上圖案。食嗰陣就要將個布甸倒轉（即係隻貓頭鷹就會向下，見唔到lu），搖一搖勻，等啲焦糖滲返入個cake度，先再倒出嚟。一嗶嗶晒三層嘅話，會同時食到蛋香味同淡淡嘅芝士味，都幾軟滑，而焦糖亦唔會話太甜，感覺幾balance。咁係因為芝士蛋糕選用嘅cream cheese係比較滑身，而芝士味冇咁濃厚嘅四葉芝士，雞蛋布甸亦特別選用歐洲蛋去整。除咗原味之外，仲有朱古力同抹茶味，老闆話遲下應該會再有多幾款味喎。

呢間小店嘅布甸燒，全部都係人手製作呀，經過蒸焗、烙印、冷凍等等嘅過程，要用1日時間先至完成。所以每日賣嘅數量都唔太多，大約200個左右，分兩輪發售：一輪12點，一輪6點，但暫時就冇得預訂嘅，只係可以現場排隊買。開飯仔採訪當日，5點未夠就已經有近十人喺門口排隊，而去到5點半就已經多人到要截龍喇。

打工仔應該都幾難食到喇嗚呀，食住布甸頂住癮先啦，同樣都係手工貨，有牛奶、紫薯、芒果、焙茶、榴槤味等，微甜，滑得嚟又似係奶凍嘅口感多啲，一啖一啖好快就吞晒，細樽咗少少咁啦。

傳統燉蛋  蘇記流心燉蛋專門店

而喺近元朗站嗰邊，就有間專食燉蛋嘅小店，門面好窄，稍為唔覺意就會行過咗。呢間小店，好專一，淨係得牛奶燉蛋白一款嘢賣，仲要淨係得一種口味，就係原味，同而家好多花款、好多口味嘅舖頭好唔同。

不過都唔係乜都冇得揀嘅，牛奶燉蛋白可以揀要凍或者熱。兩者嘅口感同味道都略有分別。如果夏天行到熱辣辣，食碗凍嘅係幾爽嘅，不過就淨係得個爽字，奶味同蛋香味就相對較淡。至於熱嘅，其實都唔係熱，係微溫啦，但就會滑身啲，牛奶味濃啲。舖頭標榜每碗燉蛋白都係純牛奶加蛋加糖去製作，完全冇加水，另外仲會喺打發好蛋白同倒入碗之前，都會嗶走面頭嘅氣泡，令每碗睇落靚仔啲。不過好老實講，一碗賣成$30，感覺貴咗少少啊。

磯燒放題  千賀水產

掃完街仲有quota食個正餐嘅，可以諗諗食磯燒放題。好多海鮮選擇呀，蝦呀、蟶子呀、鮑魚、蠔等等都好吸引，而且會有份guidelines話你聽每種海鮮應該燒幾耐，就算係地獄廚神都唔使淆底，跟住燒就得。

圖：crystalbutterfly、MelodyWong5016

其中，珍寶蠔同鮑魚都可以加入清酒去燒，大大隻，燒完出嚟，有清酒嘅清香之外，仲令原本嘅鮮味更加突出，蠔夠肥美，鮑魚亦煙韌彈牙。另外，蟹黃海膽粥亦係必食之選，綿綿der，好鮮甜。

文、相：Kar