呢排好多做放題同任食嘅餐廳啊，日本燒肉放題嘅代表有元朗呢間新開嘅餐廳，主要供應嚟自澳洲、美國同日本嘅和牛，其中澳洲樂天L’grow和牛更係首次引入香港添呀！喺冇得周圍飛嘅時間，仲可以食到唔同地方嘅靚牛，係開心嘅。

 牛舞拼盤

餐廳有多款放題套餐選擇，最平$178就有得食，仲免費送「牛舞拼盤」添。除咗牛肉任食之外，仲有多款海鮮、串燒、刺身等選擇，另有自助區供應逾30款嘅配料同日本雪糕，加錢嘅話更可以升級食埋涮涮鍋，包保個個捧住個肚走。

 樂天澳洲和牛放題

由澳洲昆士蘭區嘅樂天自家專業飼養場引入嘅穀飼和牛，油花均勻，色澤紅潤，入口帶有油香。幾款供應嘅部位包括有和牛封門柳、極上和牛粒、和牛胸腹肩胛肉、和牛肩胛肉薄切等。

 日本薩摩和牛放題

至於日本嘅鹿兒島薩摩牛，都係A4等級以上，肉質鬆軟，肉味香濃，近乎入口即溶。日本薩摩和牛放題套餐中，就有提供和牛牛赤肉、醬燒牛肋條、和牛牛肋肉同和牛薄切。

 1855美國黑安格斯肩胛牛肉薄燒巨切

大大片嘅1855美國黑安格斯肩胛牛肉薄燒巨切相當吸睛，肉香濃郁，深得牛魔王歡心。

加錢升級嘅涮涮鍋有幾款湯底選擇，特別推介牛骨Cappuccino濃湯，以大量牛骨、牛尾、雞骨同蔬菜熬製6個鐘而成，一出嚟嗰陣仲有層綿密嘅泡泡喺面，淥完嘅牛肉零舍滑身，仲好香甜。但要留意啲泡泡滾下滾下好快就會唔見咗，想食到綿滑口感就要快手喇。

海鮮有廣島蠔、虎蝦、香蒜牛油帆立貝同甲羅燒等選擇，甲羅燒撈埋蛋漿一齊燒，滿滿膏香。

 餐廳設有智能送餐機械人，可以將食物直接送到埋位，方便又衛生。

 另外亦有多款刺身及小食

 設有自助區，有多款日本直送雪糕雪條

牛舞日本燒肉‧涮涮鍋放題
地址：元朗元龍街9號形點1期1樓1073號舖

文、相、片：Kar