喺屋企煮飯煮得多，大家係咪廚藝都增進咗唔少？既然有美食就當然要配美酒，近年興起Sake Pairing，以日本清酒配搭唔同國家菜式。今次就請嚟國際唎酒師Wilson，以意式海鮮桶為例子，教大家點揀清酒先最Match！
 

國際唎酒師Wilson

 
清酒唔單止配日本菜

西餐唔一定要配紅、白酒，國際唎酒師Wilson認為：「清酒本身飲用溫度，或者釀製方法可以配合到唔同嘅菜式。」唔單止大家常見嘅日本菜，仲可以配搭唔同國家嘅食物。例如用大量蕃茄、香草、海產嘅意大利菜，就好啱配清酒。

皆因清酒只用米去釀造，味道較為乾淨清爽，而且比白酒有更多氨基酸，唔單止可以去除海鮮腥味，仲可以提鮮！而且清酒飲用溫度範圍比啤酒或者紅白酒更闊，例如配海鮮或者味道比較濃嘅主菜，可以凍飲辛口種類嘅清酒，而配油花豐富嘅Parma Ham，就可以暖飲比較酸嘅清酒。
 

清酒按香味可以分為唔同種類，伯楽星 特別純米（右）米香、旨味較重，而純米大吟釀（左）同純米吟釀（中）嘅花香同果香會比較突出

 
睇種類揀清酒配搭

講咗咁多例子，咁即係點揀清酒嚟做Sake Pairing？日本清酒按香味大致可以分為薰、爽、醇、熟四大種類。香港人最常飲嘅吟釀就屬於「薰」，花香同果香比較突出，適合配搭用香草調味，味道輕盈嘅菜式。辛口爽快嘅「爽」清酒，因為Aftertaste比較淡，感覺Refreshing所以比較百搭。

而米香同旨味較重嘅「醇」同「熟」，就可以試下配中菜，好似Wilson就會用酒香濃厚嘅特別純米配搭港式豬骨煲，用清酒嘅酸度同餘韻去解膩。簡單啲嚟講，酒味濃郁嘅清酒配搭返濃味嘅料理，酒味清爽嘅清酒就襯返味道輕盈嘅菜式。
 

彗 初汲 吟釀酒體清爽，帶檸檬香氣，可以帶出海鮮鮮味

Wilson今次就選擇以彗 初汲 吟釀去配搭Pasta Zone推出嘅海鮮Bucket作為套餐，海鮮桶用檸檬、香草等製作醬汁，加上吟釀清新怡人嘅酒香，就會令海鮮鮮味喺口腔裡面爆發出嚟！海鮮Bucket亦特別改良，唔用一般嘅蒜蓉牛油醬，改用青檸海鮮湯去煮海鮮，倒出嚟唧上檸檬汁，再點埋泰式風格嘅酸辣香草汁，增加味道層次。

海鮮Bucket包括每人一隻龍蝦、蟹，龍蝦殼已經處理好，容易搣開蝦殼方便食到啖啖肉，蟹亦非常多膏。仲會有各款時令海鮮，例如採訪當日就有肉厚鮮甜嘅蜆，同好啱點酸辣香草汁魷魚。店主怕大家無主食嘅話唔夠飽肚，仲會有粟米、薯仔，同另附嘅自家製麵包。
 

海鮮桶非常豐富，集合龍蝦、蟹及多款時令海鮮

 
最近興咩清酒？點儲存？

Wilson留意到近年日本一啲大嘅酒莊開始注重研究釀酒嘅技術，好似香港人熟悉嘅獺祭，會推出使用「遠心分離」技術嘅純米大吟釀，所謂「遠心分離」即係用高速旋轉，將酒液同酒粕喺無重力狀態下抽離，撇除雜味就可以品嘗到山田錦最原始嘅芳醇米香。

另一個潮流就係市場多咗有氣清酒嘅選擇，亦係近年日本OL嘅最愛。有氣清酒分兩種，第一種係釀好清酒後將氣泡打入去。第二種就好似香檳咁，通過二次發酵自然而成，所以口感會比第一種更柔滑。例如菊泉 彩のあわ雪就係瓶內二次發酵嘅有氣清酒，味道帶荔枝甜香，賞花嘅時候飲就啱喇。
 

（左）菊泉 彩のあわ雪有汽清酒，（右）獺祭 二割三分 遠心分離 純米大吟釀

買完清酒當然唔想浪費，咁就要小心儲存喇。清酒第一怕日曬，第二怕溫差大，最好存放喺陰暗，溫度較低而且穩定嘅地方。而開過而又未飲完嘅清酒，就可以放喺雪櫃裡面，記得要三日內飲完！至於坊間有教話清酒無軟木塞所以要打直擺，Wilson就指以佢嘅經驗嚟計，打直或者打橫擺其實分別唔大。

有個關於清酒嘅小知識Wilson想分享畀大家，清酒大部分都係水，所以其實水質比起米會更影響到清酒嘅風味。水有軟硬之分，硬水釀嘅清酒會比較剛烈，相反軟水釀嘅清酒會較為淡麗，下次揀清酒嘅時候不妨多啲留意下。

最後教大家一個小貼士，如果屋企無清酒杯嘅話，用葡萄酒杯都得！特別係花香比較濃嘅「薰」清酒，因為鬱金香形嘅酒杯可以聚集香氣，等大家更徹底欣賞到清酒嘅香氣。
 

Pasta Zone 海鮮Bucket + 彗初汲吟釀套餐：訂購網站

文：Cathy
相、片：Tom Li