全港第3間MOS Cafe喺今日正式開業，新店環境好green之餘，仲推出咗兩款鰻魚新品──蒲燒鰻魚飯、蒲燒鰻魚珍珠堡，其中蒲燒鰻魚飯更加係全球首推嘅新產品添！今日開飯仔就為大家率先試味！究竟味道如何？即睇試味報告！

以往MOS Cafe 曾經都推出過蒲燒鰻魚珍珠堡，不過鰻魚品質一般，而且好薄身，今次新出嘅蒲燒鰻魚珍珠堡 ($43) 會選用厚身、肥美嘅鰻魚，再加埋山葵蛋黃醬、紫菜、生菜及滑蛋，夾埋喺珍珠堡大啖大啖咁食，口感好豐富。

鰻魚質地肥厚，好有咬口，加埋照燒雞汁及wasabi醬，味道香濃得嚟又帶少許清爽感。美中不足嘅係，食到有少許鰻魚骨。

整體來說，鰻魚飯加埋即炒滑蛋、加入咗山葵蛋黃醬嘅野菜，分量都幾大，價錢只係 $59，都算抵食嘅！

而8月尾，MOS Cafe 全線推出3款新飯──吉列豬扒咖喱飯 ($54)、吉列豬扒飯配法式燴醬 ($49) 以及 (圖) 烤牛肉飯 ($49)。烤牛肉飯好colorful，好似石頭鍋飯咁，喺牛肉飯入面加入色彩繽紛嘅蔬菜如紅腰豆、粟米、番茄等等，口感較為light啲，不太油膩。

至於MOS Cafe亦會推出海鮮為主題嘅美食，有 (左) 吉列三文魚飯以及 (右) 吉列八爪魚漢堡。

Cafe仲設有少許立食座位添！

配合旺角新商場The Forest嘅綠色主題，MOS Cafe嘅裝修都加入少許綠色元素，例如一大塊MOS Cafe草地牆，以及天花上面懸垂嘅綠色植物，感覺都幾chill。

MOS Cafe
地址：旺角奶路臣街17號The FOREST 2樓207號舖

文、相：Joy