嚟到2024年，兩餸飯仍然咁受歡迎呀，皆因佢真係抵食又有家嘅味道，啱晒忙碌嘅香港人～今期搜尋咗幾間近期新開或人氣嘅兩餸飯店畀大家，無飯一族記得要bookmark喇！
中環高級版兩餸飯 Chapter
圖：中環都有兩餸飯崛起？冇錯！呢間餐廳本身主打精緻西餐，但為咗滿足中環上班族有多啲午餐選擇，於平日推出午市兩餸飯，供應$75兩餸飯同$85三餸飯，每日約有8款菜式，如甜酸骨、肉餅、蒸水蛋等。雖然以兩餸飯嚟講定價略貴，但係每逢午飯時間都大排長龍，成為打工仔「飯堂」之一。
平食龍蝦伊麵 一龍蝦兩餸王
圖：yukiwyy
以平民價錢就食到龍蝦伊麵而聞名嘅兩餸飯專門店～首先龍蝦伊麵嘅伊麵係即叫即煮，保持到咬口，龍蝦肉質都結實，以$78呢個價錢嚟講好抵食。另外佢哋其他菜式質素都好唔錯，如豉汁蒸鱔厚肉鮮味，炸子雞就皮脆肉滑，仲有黑椒牛仔骨、椒鹽豬扒、魚香茄子、咕嚕肉同南乳豬手等，選擇好多。
上水$30兩餸飯 膳廚
圖：heimen
又一間平民恩物呀！上水呢間兩餸飯專門店$30就有交易，就算三餸都只係$35！芋頭排骨嘅芋頭好綿密，排骨帶有陣陣芋頭香氣；肉餅結實彈牙，食到肉粒同少少脂肪，肉味香濃。椒鹽蝦同椒鹽雞翼等都好香口，最正係佢嘅盒會分開一隔隔，咁啲味道就唔會撈埋一齊啦～
靚裝修三餸飯 權發小廚（佐敦）
圖： 阿涉
好多人對兩餸飯嘅印象都係裝修比較簡陋，但呢間超人氣兩餸飯喺佐敦嘅分店就裝修到好似cafe咁，乾淨企理又坐得舒服。供應30多款小菜，最受歡迎就係招牌豉汁蒸䱽魚，大大條又肉質嫩滑，真係抵過自己煮。仲有每日限量嘅游水海鮮，如蒸鱔同豉汁蟶子等，都好新鮮，想食海鮮又懶得自己整嘅朋友可以一試。
文：Yanica、Sharon
編：Cathy
