摩登茶飲店長開長有，今次呢間同樣有唔同口味靚茶供應，不過特別在門口玻璃櫥窗後居然唔係擺茶葉，而係擺滿唔同口味嘅批！原來呢間係酥妃皇后嘅姐妹店，今次玩飲品加小食嘅輕食組合，無論幾時嚟食都咁啱。
 

妃嘗樂裝修以黃色同黑白色為主，加埋牆上面嘅插畫，非常醒目。先介紹茶飲，全部茶葉都係台灣或者雲南高山茶，除咗可以熱飲嘅奶蓋茶系列之外，其他茶飲都特別選用冷萃原茶做茶底。皆因以冷萃方法泡出嚟嘅茶比起用熱水沖泡入口更清爽，少一分苦澀，咖啡因含量亦會較少。
 

玫瑰妃花雪（$25）賣相同個名一樣咁夢幻，一層層分別係加咗乾花瓣嘅芝士奶蓋，用鮮花釀加冷萃四季春茶、椰果同冰打成嘅花茶冰，同底部嘅乳酪藻珠。
 

乳酪藻珠咬開有爆漿效果，酸酸甜甜咁幾討喜。中間嘅花茶冰食到花釀嘅粒粒花瓣，略嫌甜味片重蓋過茶味。而芝士奶蓋帶少少鹹味，同花香又夾得埋。最啱鐘意玫瑰花嘅甜姐兒。
 

而金萱烏龍芝士奶蓋（$18）係店裡面嘅另一推介，奶蓋採用法國總統牌忌廉芝士配地中海海鹽，同坊間一般台式飲品店偏甜嘅奶蓋完全唔同。上面再以抹茶粉畫上閃電圖案點綴。
 

飲嘅時候記得唔好用吸管，而係45°飲落去，好似飲啤酒將泡同酒同時享用一樣，同時飲到芝士奶蓋同茶就最Perfect喇。海鹽嘅少少鹹味帶出芝士香味，茶湯清澈唔苦，而係帶青茶嘅回甘，Tea Lover應該會滿足。
 

除咗茶飲之外，亦有富香港特色嘅飲品。好似呢杯奶茶妃冰樂（$28）飲落味道就非常有港式茶餐廳風味，唔太甜加上有紅茶餘韻，值得一試。另有水果茶、果醋茶同冷萃原茶選擇。
 

半開放式廚房另一邊擺滿唔同口味嘅香港派，即係港式口味嘅Pie呀。由酥妃皇后藍帶團隊製作批底，加上港嘢茶檔總廚嘅創意，就變成八款唔同口味每日新鮮製做嘅批啦。仲可以請店員即場翻熱，或者帶返屋企用微波爐或焗爐加熱。
 

先試個魚香茄子派（$25/塊，$88/9寸），派底比較厚身，有啲似厚批Pizza。加熱後批底夠脆口，但裡面保持到柔軟又有彈性嘅麵包口感，值得一讃。上面嘅魚香茄子稍嫌鹹咗少少，不過勝在夠足料，茄子、肉碎同芝士多到幾乎舖滿哂。
 

重口味人士必選榴槤芝士派（$30/塊，$108/9寸），榴槤肉多而且夠軟同夠香，最抵讃嘅係仲有少少After Taste。不過各位榴槤Fans應該都知道而家並唔係榴槤當造期，店方亦表示遲啲如果搵唔到合適嘅榴槤肉會暫停供應，想試嘅話要把握時間呀。
 

旺角店暫時仲係試業期間，之後唔排除會繼續推出新口味。而店方亦表示等旺角店上咗軌道之後，會考慮喺其他地區開設分店！以後口痕想食輕食就多個選擇啦。
 

妃嘗樂
旺角弼街64號地下A號舖

文、相、片：Cathy