好多人都鍾意食片皮鴨，但香港專門做片皮鴨嘅餐廳實在唔多，除咗尖沙咀新開嘅羲和雅苑，呢一間喺灣仔嘅古琴雅苑同樣都係主打北京填鴨。雖然店名好相似，但其實係兩間獨立餐廳嚟架！古琴雅苑係香港集團，定位較親民，亦有一系列淮揚菜式。

嚟到當然要食烤北京填鴨啦，呢度算抵食，$328有全隻，半隻更只需$168，比同類型餐廳平一半而且份量十足！師傅於北京全聚德擔任顧問逾20年，烤鴨做法依足當地傳統，選用約5斤重鴨，風乾、急凍程序超過48小時，之後於特製烤爐烤足1小時，先做到外層酥脆而肉嫩多汁效果。每隻鴨出爐至片皮上枱，不過10至15分鐘，保證熱辣辣。

師傅稱，烤鴨要切到108片先為之標準，而且不經醃製，先食到鴨本身的香味。一開始可以先食「一口酥」，即係燒至透身的鴨皮。脂肪呈蜂巢狀，點砂糖一齊食，入口即溶，鴨油超香，但砂糖甜味可以中和油膩感。

之後就可以食鴨腿、鴨胸肉，鴨胸皮肉相連，傳統食法之外，仲可以配哈蜜瓜、自家製蜂蜜黃梅醬同京葱、青瓜一齊食，香甜開胃。想有啲新意，更加試試酒糟版，鴨肉帶濃烈酒香。開飯仔之前去過羲和雅苑，覺得兩間烤鴨店雖然同樣跟北京名店全聚德有啲關係，但味道風格各有唔同。羲和雅苑走高檔路線，賣得較貴，但鴨肉較大片工整。古琴雅苑就抵食，鴨肉切得較細，但鴨油同香味都唔輸蝕。

另外仲有紅燒八寶鴨($328，需預訂)、醬爆鴨架、涼瓜燜鴨架、蘇式爆炒鴨絲同鴨鬆生菜包等菜式。八寶鴨更係傳統葫蘆形狀，餡料多而且帶肉香，糯米軟綿入味。

海鮮方面必試醬炒年糕蟹($24/兩，約$500)，選用斤半以上肉蟹，非常大隻！蟹肉飽滿結實富鮮味，而且火候啱啱好唔會老。醬汁微鹹，配年糕非常惹味。

十三香農家雞 ($108) 選用本地冰鮮雞，加入涼瓜、乾葱、洋葱及13種香料製成，上菜前將砂鍋燒熱，一開蓋就聞到香氣，雞肉都好入味。

餐廳裝修簡約舒服，座位唔多，近期好多人去試，建議打定去訂位。

古琴雅苑

地址: 灣仔皇后大道東202號QRE Plaza 19樓

文、相、片：Perrins