北海道第一湯咖喱登陸旺角新增香港限定版烏冬挑戰99級無語辣

湯咖喱係日本北海道札幌嘅名物，不過喺香港就唔算有太多專門店可以食到。而家機會嚟喇，嚟自北海道嘅獲獎湯咖喱店喺旺角開設海外分店，更特別為咗香港巿場而新增咗湯咖喱烏冬，連日本都冇架！

章魚燒、海苔天婦羅魷魚、唐揚炸雞

Suage喺日文有「素炸」嘅意思，即係冇使用任何麵漿，直接就將食品放入油炸。餐廳董事齋藤右京解釋，咁樣可以保存食品嘅原味同埋香味，仲有食品本身嘅顏色，無論睇出嚟定食落去都更好食。餐廳今次喺香港開分店，緣起都係因為Suage喺北海道札幌嘅本店度，時不時都接待好多嚟自香港嘅遊客，然後佢哋都表示好想喺香港食到，就促成咗今次嘅契機啦。

了解港人喜好特設香港限定

龍蝦海鮮盛湯咖喱烏冬(櫻花蝦濃湯)，更可加半溶芝士

日本總店主要係食湯咖喱飯嘅，但嚟到香港就變咗主打湯咖喱烏冬。齋藤右京話：「我聽講香港人都好鍾意食麵類，所以今次特別為大家呈現烏冬麵同拉麵等麵類畀大家選擇。」多款麵食中，首選力推龍蝦海鮮盛湯咖喱，龍蝦、青口、帶子、墨魚等海鮮好豐富，建議選配櫻花蝦濃湯咖喱湯底，本身自帶清甜嘅咖喱湯中會再多咗層鮮甜味道架，芝士控更可選擇追加半熔芝士！

脆嫩雞髀湯咖喱烏冬 *極辣10 (椰子湯底)

而脆嫩雞髀湯咖喱則係北海道傳統嘅食法，選用日本錦爽雞，雞髀大大隻佔咗隻碗近半嘅位置，好啱打卡。
舖頭靈魂當然在於咖喱湯底，以番茄、洋蔥等多種蔬菜再配搭多種咖喱、香類同肉類熬煮最少12個鐘而成，香口得嚟亦唔會太杰身，而且顏色清澈。雖然咖喱味冇想像中嘅濃郁，但卻有陣陣清甜之感。除咗原味以外，亦可以選擇櫻花蝦濃湯以及椰子等湯底，層次更為豐富。