以前北角邨地皮，新酒店Hotel Vic終於落成，係區內唯一嘅五星級酒店！座擁無敵海景，酒店行型格hip hotel路線，酒店內放滿唔少藝術品，而且分東西翼都好大吓。不過開飯仔最關心都係有咩食，有自助餐、24小時嘅Deli及頂樓酒吧餐廳。
自助餐廳名為The Farmhouse，格局充滿田園農舍氣息，一室earth tone都幾特別，原來係請來著名設計師Andre Fu操刀，難怪風格幾潮幾有型。而且有露天抖氣飲嘢位，秋天坐出面食燒烤一流。
餐廳都幾大，室內可以容納210人。自助餐枱就分兩部份，一入門口就係海鮮冷盤區及甜品區，即刻已經可以拎碟掃海鮮！雖然冇生蠔，但海鮮選擇豐富，有開邊波士頓龍蝦、鱈場蟹腳、三點蟹、翡翠螺、青口同蜆。有鮮味，而且refill得密。
刺身壽司都唔弱，每逢周末就有原條魚即席解體，採訪當日就有黃鰭吞拿魚，味道質感同雪藏貨完全唔同架。另外仲有好大隻嘅牡丹蝦、帶子、油甘魚、三文魚等，壽司亦有三文魚子、鰻魚等。
沙律、凍肉及芝士就放喺雪櫃入面，風乾火腿都有五六款，巴馬火腿、salami等，沙律款式就唔算太多。
不過驚喜位係有即榨新鮮蔬果汁，有雪梨、甘筍、西芹等等俾你任揀任mix and match，唔加糖唔加水即榨俾你飲，夠晒健康（兼消滯），唔飲果汁亦有樽裝汽水任飲。
熱盤區就喺餐廳入面，40米長雲石枱放滿中西東南亞菜，第一時間要食火山石燒烤，有焗生蠔、燒扒及沙嗲串，亦有即切烤牛肋骨。
即製食物都幾多，好似有即煮意粉、即焗pizza、即煮日式拉麵或者越式牛河等，熱辣辣而且可以自選配料。
特別訂造大蒸籠有各款中式點心，亦有燒味、水煮牛肉等中菜。不過都有驚喜，都係有街頭小食！好似豬皮蘿蔔魚蛋，惹味嘅有麻辣雞翼尖、咖喱魷魚、咖喱豬手等，好有comfort food感覺。
甜品區有部旋轉雪糕機，放滿Movenpick同Haagen-Dazs雪糕杯同雪糕批。旁邊亦有師傅即席crepe同waffle，亦可以自己DIY豆腐花，有得食有得玩。
一件件甜品就唔算多，但賣相味道精緻，好似有泡芙、Tiramisu及抹茶蛋糕等。
自助晚餐每位$598/起，價錢都唔算平，不過新張有85折優惠，至到30/9！
地址：北角邨里1號海匯酒店西座二樓
自助晚餐價錢：
星期一至四 成人每位$598、長者及小童每位$299
星期五至日、公眾假期及前夕 成人每位$668、長者及小童每位$334
文、相、片：Perrins