香港人聽到放題就好開心，咩都可以任食，樣樣都可以試啲嘛~ 但連德國腸都有得放題？係呀，太子有間德國餐廳嚟緊準備再度推出呀，10幾款腸，98蚊任食個半鐘，仲比之前嗰次多咗幾款腸同醬料選擇添~

放題之前，做定少少功課，睇下有咩腸食先，主要都係嚟自德國嘅，亦有部分係其他地方嘅：

香濃芝士腸幾時都係最受歡迎嘅腸，新鮮熱辣辣出嚟嗰陣即食，仲可以見到中間真係有芝士醬咇出嚟㗎。

豬肉腸有幾款，包括紐綸堡腸、香茸豬肉腸、煙燻香茸豬肉腸同盧根尼卡腸等。當中又以紐綸堡腸嘅豬肉味最濃。

肉腸嘅仲有火雞芝士腸，直布羅陀牛肉腸，前者嘅芝士味幾香，而後者嘅牛肉味都重。另外仲有口感相對實啲嘅純牛仔肉腸。

至於海鮮腸方面，就相當有驚喜。黑麻麻嗰款一睇就知係墨魚汁腸，唔止有色水，仲有真‧墨魚粒，有咬口之餘，仲有淡淡嘅墨魚汁味；另一款煙三文魚腸同樣都真係有三文魚肉喺入面㗎，香口啊。

同場仲有德國馬鬱蘭腸、德國咖喱腸同莎樂滋味腸等等，不過每晚會因應來貨等供求，腸嘅種類或者會有啲啲唔同。BTW，雖然啲腸就咁齋食其實都好夠味，不過餐廳亦都有提供多款醬料選擇，例如：健力士黑啤醬、車打芝士醬、黑松露醬、水牛城醬，同德國酸菜等，仲用個靚靚嘅摩天輪裝住添~~

咁多腸食，如果加多杯啤酒咁就perfect池喇。略帶菠蘿香嘅Furstenberg Weissbier同蜜糖甜味、果香味、麥香味都幾balance嘅Warsteiner Lager兩款啤酒味道相對淡身，正好中和返咁多濃肉嘅味。食放題加多啲啲錢，就可以有1.8L開心飲喇。

餐後仲會送「甜品」，熱飲嘅Berryhof藍莓甜品酒。加入藍莓汁後，令到本身有濃厚藥草味嘅jagermeister滲有酸酸甜甜嘅味道，更易入口。

詳情
放題暫定重推日期：3月19日 6pm起
試食日：3月2、3、9、10、16、17日
價錢：
星期一至四：$98/位（90分鐘）
星期五、六：$138位（120分鐘）

Bierhof
地址：太子界限街44號地下

文、相：Kar