邊個話一人火鍋只可以去快餐店先食到？而家喺旺角就出咗間升級火鍋店，剩係火鍋湯底都有30款，而且龍蝦、和牛、鮑魚都食到，唔使一百蚊就食到！加上有兩條高速輸送帶，將食物直接送到你面前，一個人食又有乜好怕喎！即睇呢間超級熱血嘅升級火鍋店。

入座後用平板電腦揀選心水嘅火鍋湯底、調味料、食物、飲品等，好方便。

大約1分鐘左右，高速輸送帶會將火鍋湯底、refill送到你枱前，將湯底放到你枱上嘅盒中，就可以開爐啦！記得記得記得，拎晒野就㩒一㩒亮起紅燈嘅燈掣將輸送帶送走，唔係嘅話就會聽到燈掣附近嘅蜂鳴器不斷發聲架啦！

至於30款湯底就梗係唔會一次過晒冷啦，唔係好多選擇困難症患者都好頭痛。每日會有8款湯底供應，味道都好新穎好特別，當中有兩款會不時轉換架！

今次就畀12款湯底畀你過目先，有意式卡邦尼湯、法式紅酒香草雞湯、日式枝豆雞湯、蒙古養生湯、抹茶雞湯、紫蘇梅子湯、中國水仙茶湯、星馬叻沙湯等等。

唔知揀邊款？不妨試下店子主打湯底——熱血湯，以番茄、紅菜頭烹煮而成，味道酸酸都幾開胃。有3種辣度選擇，開飯仔推介熱血1號，少少辣，而不太辣。

揀好湯底，輪到調味料啦！每人枱上都有1包甜豉油，想加其他調味可喺平板電腦落柯打架，例如腐乳蝦醬甜豉油、蜜糖是拉差辣醬、魚露蜆蚧醬、沙茶醬、芝麻醬等17款選擇。

肉類都有十幾款選擇，推介美國肩胛板腱、巴西牛舌，肉味夠濃，而且有咬口。（由上至下、左至右）巴西牛舌、英國安格斯牛小排、美國肩胛板腱、美國牛肋條、澳洲和牛肩脊及丹麥雞腿肉。

至於海鮮就一定要叫波士頓龍蝦，平時單食至少百幾二百蚊，呢度只需$58，雖然得半邊，但有好彈牙嘅龍蝦肉食，都算抵啦！

而丸類方面就介紹番呢個直徑有5cm嘅巨型手工丸，以薄薄魚肉包住甘筍粒、洋蔥粒及麻辣醬而成，好辣，但好入味。

其他食物有鮑魚、牛肉芝心丸等。

想飽肚啲，餐廳都有3-4款麵條供應，除咗常見嘅烏冬、韓國拉麵，仲有好似粗麵嘅客家板條。將麵條淥滾後夾上碗，然後可以灑上童星點心麵、玄米粒或者鍋巴，食落更有口感。

除咗火鍋配料，另有前菜小食，開飯仔推介皮蛋醬豆腐、冰沙子薑皮蛋，尤其是後者，微酸嘅子薑做成冰沙咁，好開胃。

雖然係火鍋店，但舖頭以運動做主題，並喺牆上掛滿運動員插畫及座右銘，都幾特別架！

HOTPOT PNP 熱血一流
地址：旺角奶路臣街17號The Forest地下G12號舖

文：Joy、相：Joy、Cathy、片：Cathy