又有台式飲品店嚟到香港開分店！不過今次唔係普通珍珠奶茶，而係主打現打鮮果汁嘅健康飲品店呀。招牌係品牌首創嘅鮮蘋果系列，用原個蘋果慢磨成香甜唔使額外加糖嘅果汁，再配搭出唔同口味。另一推介係雲朵沙冰，鮮果沙冰加上乳酪，清新得嚟又幾飽肚！
 

樂法嚟自台灣，銅鑼灣店暫定3/4試業，9/4正式開張。品牌推崇自然、樸實、簡約嘅生活態度，所以特別選用世界各地季節鮮果，利用水果自然甜味調配出唔同健康鮮果飲。香港店方面，主打嘅水果會從果欄按當造時間挑選唔同產地出品，或者從台灣運水果原汁到港，絕對唔用任何化學風味糖漿。
 

品牌首創嘅鮮蘋果系列顧名思義以蘋果為主，中杯要用到2個蘋果，大杯更加要用到3個！而且會用到經改良嘅慢磨機，以每分鐘60轉嘅低轉慢榨方式萃取蘋果汁。好處係減少氧化，亦唔會產生熱力，保留水果更多營養！蘋果只會選用富士蘋果，甜度適中，所以建議大家可以揀無糖！
 

蘋果優利卡（$32/中杯，$40/大杯）

優利卡指台灣其中一款檸檬品種優利卡（Eureka），所以簡單嚟講呢杯係檸檬果汁加上蘋果果汁！飲落先有檸檬酸香，之後蘋果嘅甜味慢慢滲出，酸甜平衡、清新順口。而且蘋果富含水溶性同非水溶性纖維，升糖指數低，係都市人快速「一日一蘋果，醫生遠離我」嘅好幫手！

如果怕太酸嘅話，另有蘋果鮮綠（$30/中杯，$38/大杯），將檸檬汁換成綠茶，少一份酸味而多一份青茶嘅回甘，整體甜度更低。
 

火龍果雲朵沙冰（$49/大杯）

每杯用上170g、即大概半個紅肉火龍果，先加冰同果糖打成沙冰，中間再以乳酪喺杯邊畫上白色雲朵圖案，就完成呢杯賣相非常亮眼嘅沙冰！飲落可以咬到火龍果嘅果籽，撈埋乳酪味道甜甜哋。紅火龍果比白火龍果更有助抗氧化，果肉纖維加上乳酪亦有飽肚感，細食嘅女士們買一杯當健怡下午茶都得呀。

 

草莓奶蓋歐蕾（$35/中杯，$40/大杯）

呢度嘅奶蓋同坊間近年大熱嘅芝士奶蓋唔同，無加芝士、以鮮忌廉為主而且係低糖配方。呢杯以青茶為底，加即打士多啤梨果汁，最後加上奶蓋。打完卡之後記得搞勻變成粉紅色先飲，士多啤梨嘅酸甜同青茶嘅清爽非常夾，奶蓋令口感更加柔滑，有啲似飲緊清新嘅士多啤梨奶茶。
 

玫瑰檸檬蘆薈（$40/大杯）

有亮眼嘅漸層賣相，一層層其實分別係蘆薈、蜜糖同玫瑰水，頂層再有乾燥玫瑰花瓣點綴。雖然凍飲聞起嚟唔算明顯，但一飲玫瑰香非常突出！蘆薈粒同蜜糖增加咬口同甜度，最值得一讃嘅係花香同甜味都相當自然，無人工香精感易入口。
 

舖頭雖然唔算大，但亦特別劃出一角擺咗張細吧枱，上面仲有乾燥花裝飾，絕對係打卡位！香港店暫時未有香港限定飲品，不過希望之後可以同台灣一樣推出各種期間限定嘅鮮果飲，將更多唔同口味嘅健康鮮果飲帶畀大家。
 

樂法
地址：銅鑼灣渣甸街46-53號渣甸中心地下C舖

文、相、片：Cathy