最近唔少飲品店開張，但講到重口味，或者無一間匹敵：因為觀塘呢間以榴槤為主，唔少都加入貓山王或者金包榴槤果肉。奶昔仲用一粒去核榴槤肉再加果蓉打成，完全唔需要加糖都夠哂味，幫各位榴槤Fans們消暑兼過足癮！
 

相信唔少榴槤Fans都有去過榴槤BB位於觀塘嘅總店，而佢地繼不定期舉辦嘅榴槤放題同榴槤市集之後，最新搞作係將總店一角變身榴槤BB Cafe！有榴槤珍珠奶茶、榴槤芝士雲頂茶、榴槤焦糖脆奶茶同榴槤奶昔等種類。
 

 一舊貓山王跌落奶（$48）

自問係Die Hard Fans就要試味道最濃嘅榴槤奶昔！叫得一舊貓山王跌落奶，就真係用咗一舊新鮮去核貓山王果肉，再加自家品牌嘅30g貓山王果蓉，加牛奶同冰打成香濃奶昔。一滴糖漿都無加到，保證飲到嘅係嚟自榴槤嘅甜香。最後再加少少果蓉喺面，飲落都幾幼滑，而且甜味適中，唔驚唔覺就會飲哂成杯。
 

貓山王焦糖脆奶綠（$38） 

如果無甜不歡嘅話，就可以試有焦糖脆面嘅焦糖脆奶茶系列。奶茶當中加入榴槤果蓉，之後會加即打奶泡同糖喺面，最後即席燒成香脆焦糖！撈勻嚟飲先飲到焦糖甜味，之後就有榴槤嘅香味同茶嘅微甘。
 

貓山王芝士雲頂炭燒烏龍茶（$38）

另外亦有近年大熱嘅芝士奶蓋，不過嚟到呢度，就變成榴槤芝士奶蓋！拎上手記得唔好立刻用吸管飲，應該用杯蓋傾斜45度，將奶蓋同茶一齊飲。榴槤芝士奶蓋嘅榴槤濃香同芝士嘅鹹香有相輔相成嘅效果，之後就可以搞勻享用，奶蓋上面有再加榴槤果蓉，飲飲下隨時食到果肉。
 

貓山王珍珠奶茶（$38） 

珍珠奶茶嘅甜度較高，珍珠嘅焦糖香有少少蓋過咗榴槤香。對於普通人嚟講應該算係最容易入口，而榴槤Fans就建議揀返半糖或者微糖，咁就更加容易飲到奶茶當中嘅榴槤香。
 

除咗榴槤奶昔之外，其他飲品都可以揀全糖/少糖/半糖/微糖/無糖，冰度呢就係固定嘅。唔想飲榴槤飲品嘅話，呢度亦有純茶飲。上到嚟仲有榴槤品鑒盤，同其他榴槤食品可以揀返。最後溫馨提示一句，呢度逢星期二休息，唔好嚟摸門釘呀。
 

榴槤BB
觀塘敬業街65-67號敬運工業大廈2樓B號舖

文、相、片：Cathy